近排新股浪接浪，搞到華華眼花花，對於一啲冇時間冇心機刨招股書嘅散戶，城中富豪成為佢哋最佳盲公竹，雖則話股神有時都會睇錯市，入錯貨，但係佢哋借得個名出嚟俾人做宣傳，間公司應該點都唔會完全唔掂。
之不過，到富豪旗下自家公司搞上市，點樣做宣傳就要動吓腦筋，今日響自己地頭君悅酒店做路演嘅新世界百貨（825），為咗吸引大家眼球，據講會出動被喻為新世界接班人嘅鄭裕彤長子嫡孫鄭志剛擔大旗。
現年27歲，讀完書好耐嘅鄭志剛，舊年9月至入新世界幫手，之前佢嘅經歷冇咩特別，同好多富豪第二第三代一樣，先響外邊機構「受訓」，彤叔長孫嘅外訓機構係高盛同瑞銀。
聽講佢響瑞銀嘅時候，係跟金牌公用股分析員許淑芳學嘢，分析中國電力股，番新世界後，亦先入新世界中國（917），然後至做埋新世界發展（017）同埋上市在即嘅新世界百貨嘅執行董事。
咁都好自然，事關彤叔早已睇好中國嘅發展潛力，乖孫歸巢梗係要佢先學會響中國做生意啦，於是，彤孫就去北京住咗半年，觀察官情、商情、民情，至於領會到幾多，就要日後至知囉。
[email protected]