眼前有所有我要的冬裝，超級粗冷的灰色cardigan，磨皮的連帽軍褸，酒紅色velvet面的羽絨外套，水貂皮草造的peacoat，黑色駱駝毛襯粉紅夾裡的曳地斗篷……我卻連試的欲望都沒有，老實講，如果發明了令人有心機扮靚的偉哥，我這個時候最好打孖上……
……是有這樣的日子的，大前年8月的巴黎，攝氏37度的下午，在MariaLouisa冇開冷氣的男裝部，的確發生過這種情況。
當時對着靚到絕而且香港未有的JohnGallianomohair樽領冷衫，苦苦思量了5分鐘……都係唔得，都係唔試得，睇到已經覺得拮，想起10分鐘前在RueSaint-Honor囗的大街大巷，遠遠瞥見香港某知名時裝達人，走近打招呼時睇見佢熱到面上掛着粒鼻屎而不自知（嗱嗱嗱，冇得傾，今次你喺街上面撞到我問我呢個其實係邊個我都唔會開名㗎嘞），我就知道這一天確是這樣的一個日子──扮靚系統崩潰的日子。
因為熱。好×熱。
年年有今日
消夜落街食碗麵你襯過嗎？
由酒店房落泳池游水你襯過嗎？
去八仙嶺行山你襯過嗎？
我全部都襯過！
事實上，半夜3點突然絞肚痛要飛的士入急症室，我都要襯過衫才肯出門口。
從不自暴自棄，一路堅持到最後，到最後每年還是有幾天失守。
而這幾天恐怕又要來了，還是已經來了？
35度以上的日子，如果不能留在家中開大冷氣躺着，我認為每一個人都有放棄扮靚的權利，旁觀者不得𠵱牙鬆槓。
點扮唧大佬？根本唔想躉嘢上身。
事必要出街的話，我覺得只得兩條路可以揀，沒有C餐。
A)積極者之選──All-in-one套餐：
多年前在朋友的生日飯局碰見張曼玉，她穿了條灰色純棉背心裙，不等扮到隻雀咁的其他人開口盤問：「乜咁素呀今日？」她自己先發制人解釋咗先：「我食完飯陣間即刻上飛機去歐洲，這是我的飛機裙，又舒服又唔失禮人。」沒錯，這條裙以晚裝來說太克己，以「飛機裙」來說已是華麗有突了，我當時的啓發是：（坐飛機）這麼艱難的時候，對自己還能這麼有要求，咪就係style囉。舉一反三，在（37度）這麼艱難的時刻，一樣可以one-piece的東西解決。只不過又「一件頭」又「夠照」的東西難搵之嘛，如果你搵到一件衫同時符合上述兩個條件，實在應該全個系列掃清。
可惜想還想，現實世界幾乎從無如此清爽的事，男人本來就很少onepiece衫連褲可買，除非車房同事的蛤乸衣；女人有很多onepiece裙可揀，卻要戴胸圍，到頭來也不是真正一件頭。所以我有理由相信，鼓勵不戴bra的婦解運動，源自非洲，阿拉斯加婦女在這方面根本不必那麼積極。
B)消極者之選──棄權套餐：
重點在於額頭鑿字「我今日唔參賽」，要全世界一眼就望得出你今日太熱主動棄權，請廣大評判高抬貴手暫停評分，否則以為你盡了力卻麻麻地靚，就唔係幾好。淨色tee與牛仔褲是國際通用的電碼，觀察家一般都會收到訊息──「東主避暑，是日休息，勿指手劃腳」，如果你還未學會這套暗號，速記下，有用，因為你年中都總有「唔方便嗰幾日」，遵守基本法，大家都好做。
如果科學家的預言屬實，則50年後會有更多「扮靚系統崩潰的日子」，請學定上述AB餐，為世界與自己作好兩手準備。
至於怕熱如我，則希望自己最多只活多49年，並穿着人類最後一件茄士咩大褸圓寂。
黃偉文自我簡介
填詞人，其實最鍾意買嘢，最憎寫字，星期日盡可能唔寫字，去買嘢。
本周願望：時裝界有句三毫子格言：Lessismore。
在36度的氣溫下，呢句嘢諗落都幾恐怖，有些時候，我只希望LessisLess。
Textby黃偉文
