「禿頭」同「肥妹」不嬲爛蒲爛玩，人怕出名豬怕肥，𠵱家佢哋都蒲得好小心，唔敢去啲人多嘈雜嘅夜店。禿頭成日覺得自己壓力大，搞到甩頭髮；肥妹就最驚俾朋友出賣，所以成日好驚青。佢兩個都好似有被迫害妄想症咁，但就選擇唔健康嘅方式嚟減壓，就係去朋友屋企開迷幻party。
原來禿頭同肥妹入行前已經有食藥物嘅習慣，𠵱家嘅濫藥情況更加嚴重，不過提供藥物嘅損友亦非常小心，為免俾人放蛇，每次都指定要佢哋自己攞貨，話之你係天皇巨星都冇情講，佢哋惟有硬住頭皮親自出馬，戴晒黑超、帽同口罩，扮晒蒙面俠，去交易地點鬼祟攞貨。所謂上得山多終遇虎，佢哋如果唔戒惡習嘅話，分分鐘自毀前途。
Textby關仁