童年時居於石硤尾的七層大廈徙置區、一家七口擠在百多呎單位的詹瑞文，小一到小三都是在簡陋的天台學校讀書，那裏會想到其體內潛藏着溢瀉的演藝細胞？阿詹在香港演藝學院畢業後，曾到英國拜藝於形體劇場導演DavidGlass及歐洲戲劇大師PhilippeGaulier門下。他回港發展後，在演員培訓及劇場教育方面表現出色，由他來評價周潤發、周星馳、梁朝偉和黃秋生等影帝的演技，有沒有人會說他不夠資格？
撰文：陳月媚
舞台創作人兼跨媒體表演藝術家詹瑞文，曾擔任香港演藝學院客席戲劇導師，又出任過無綫藝員訓練班表演及默劇導師，連日本戲劇學院都邀請他到東京講學。近年他涉足電影界，對以下六位演員特別留下深刻印象。
星爺風格獨特
阿詹說：「演技來自生活，香港有好多演員都係打天才波，冇乜受過正統演藝訓練，但一樣可以經過時間磨練同天份，成為一位出色嘅演員，好似周星馳咁，佢的確係一個有才華嘅喜劇演員，我同佢傾過幾次偈，星爺好有想法，清楚自己嘅角色定位，演戲有一套自己嘅風格，喺佢嘅電影入面，佢簡直係唯我獨尊。」
發哥演活角色
周潤發無論處世和演戲都深得詹瑞文欣賞，較早前發哥更抽空欣賞阿詹的舞台劇《男人之虎》，兩人可謂惺惺相惜。
「我欣賞發哥嘅地方，係佢無論拍香港戲或西片，你會睇到佢演每一部戲都係好努力同專注，作為演員，好專注去演一個角色係好重要嘅。」
秋生摸到法門
黃秋生和阿詹不但同是畢業於香港演藝學院，又分別跟隨過戲劇大師PhilippeGaulier學戲，但兩人的演戲風格卻各有不同。
「秋生演戲較處內，佢成日話演戲最高深處就係唔做，唔使加任何嘢落去，呢個方法我唔係咁認同。佢係採用一點演技法，做戲已經摸到自己法門。我記得有一晚睇完《江湖告急》呢部戲，佢真係演得好精采，自己都忍唔住即刻打電話讚吓佢。最近我同佢喺《戲王之王》正式交手，幾分鐘嘅對手戲，我哋一take就搞掂，過足戲癮。」
偉仔天才演員
梁朝偉曾經與詹瑞文合作電影《行運超人》，但同場不多，阿詹認為偉仔是感性型演員，因外形討好，容易被觀眾受落。
「梁朝偉係較類型化演員，佢喺一部戲做得好唔好，其實好睇個導演點用佢，好似佢喺王家衛嘅電影就發揮得最好，佢都係屬於天生有talent嘅演員，如果我冇估錯，佢拍戲應該唔多鍾意喺現場睇playback。」
鄭中基太快定位
鄭中基與阿詹一樣都是走喜劇路線，而且經常有機會在電影中碰頭，不過阿詹就覺得對方太快將自己定位，反而局限了戲路。
「鄭中基擔正嘅第一部喜劇《龍咁威》，我覺得佢演得幾好，但往後一連再演幾部差唔多風格嘅喜劇，好似變化唔係咁多，唔知係咪基於商業考慮，但太快定位，只會局限佢嘅發展空間。其實佢做戲幾有幽默感，但我諗需要再畀啲時間佢。」
子華口才取勝
黃子華演棟篤笑很受歡迎，但演戲做主角，票房總是慘淡收場，不知同樣由舞台跳上銀幕的阿詹，擔正做主角會否有不同的結果？
「每個演員所走嘅路都唔同，好難作比較，我做戲唔會畀太大壓力自己。其實我同子華做嘅棟篤笑風格唔同，佢嘅棟篤笑幾夠吉士，係以口才同內容取勝，之前睇佢做鬚根show，佢已經拋離鎮宇、達明好多，子華能夠成功，係因為佢說話好有思考性，對生活有睇法，佢做嘅棟篤笑掌握得越嚟越成熟。」
