花旗嘅次按危機有惡化迹象，股民驚拖冧股市，令到上禮拜五美股受壓，唔知佢哋真驚定假驚，因為聯儲局呢個禮拜議息，好多時個市都會借勢炒。
「賭王」何生早幾日話睇恒指見25000，「股神」四叔先兩日就叫股民減磅，究竟應該信邊個？不過，聽晒四叔嘅講話，就知道「賭王」同「股神」嘅睇法其實冇牴觸，四叔話只係沽咗啲「濕濕碎碎」嘅股份，仲繼續揸住國壽（2628）同埋認購新股復星國際。四叔仲話國家經濟發展會好犀利，二三十年內隨時會超越歐美。香港背靠祖國，點會唔好？
花旗股市碌咗落嚟，今日港股多數會借勢調整，不過咁多資金湧入嚟，港股嘅技術走勢又咁靚，恒指唔會回好多，技術調整應該係低吸嘅好機會，上禮拜保險股咁掂，今個禮拜可以繼續睇好，除咗四叔品題嘅國壽之外，平保（2318）自然係另一個好選擇。
平保C輪3642：平保報收57.25元，睇個勢好快試60元，破位睇65元，可以買啲平保C輪3642，隻輪現價1.10元，槓桿率5.2倍（有效4.5倍），正股升上65元，3642應該喺1.78元樓上，正股跌穿54元止蝕。