16世紀法國著名預言家諾查丹瑪斯（Nostradamus）曾準確預測好多世界大事，時至今日，未來學家（futurist）成為政府同大企業嘅座上賓。著名未來學家托夫勒預言，亞洲將成為全球經濟嘅霸主，但對歐洲經濟就冇咁樂觀，因為好多亞洲國家都擁有傑出嘅領導人，明白科技對經濟嘅重要性，反觀歐洲人就冇咁重視科技發展。
呢股預言風吹到去網上，KeltWolf喺《MSN討論區》預測：「多家大型跨國企業會促請美國、加拿大等北美洲國家，成立一個好似歐盟嘅北美聯盟，但係唔少美國人會反對，因為美國如果加入北美聯盟，就會少咗好多話事權。」
PHILLYBALLS預言：「喺中國同印度經濟崛起嘅同時，美國會淪為第三世界國家，真係風水輪流轉！」GARBALDI話：「由於美國越嚟越多職位外判到海外，美國會有好多人失業。」Pobrito講：「未來25年內，比較便宜嘅綠色能源會取代現時大部份燃料。50年後，非洲等第三世界國家嘅赤貧情況會消失。」
非洲將脫貧
MakesCents估計：「日本將失去經濟強國地位，未來25年內，印度、南韓同中國嘅經濟規模會超過日本。」IM4ME話：「日本經常限制外國貨入口，呢種做法會令當地消費者不滿，日本人遲早會罷買日貨。」