美國夢工場電腦動畫《史力加》（Shrek）01年以醜樣同惡搞出晒位，全球票房勁收40億港元，第二集《史力加2》（Shrek2）成績同樣驕人，令一啲都唔屎嘅《史》片系列保持全球動畫No.1地位。今集《史力加3》（ShrektheThird）嘅導演之一係香港土生土長嘅許誠毅，電影加入港式笑料，女主角費安娜公主又大發雌威，唔單止一口氣生咗三胞胎嘅綠色BB，仲率領一班幸福公主組成「師奶兵團」抵抗外敵，唔靠男人一樣醒！ 撰文：戶川淳
本周四（28日）上映嘅《史力加3》延續上集，講到史力加同費安娜公主拉埋天窗，從此過住幸福快樂嘅沼澤生活，但變番青蛙嘅夏洛國王突然病重，臨危授命要史力加伉儷繼任為國王同王后，着起龍袍都唔似太子嘅史力加，為咗「卸膊」即刻急call驢友同貓貓，一齊出發搵費安娜嘅遠房親戚阿瑟王子頂檔。
史力B夠趣怪
今集繼續惡搞童話故事人物，無非都係想帶出女人要自強嘅訊息。咪睇費安娜公主自小嬌生慣養，喺今集當佢老公史力加出國搵皇位繼承人嘅時候，一直吼住王位嘅魅力王子又帶齊佢班奸黨鐵鈎船長、蝦你女巫同魔怪樹妖等大隊人馬殺到埋身，密謀叛變奪王位搞「溏心風暴」，費安娜公主惟有靠自己，扮「大契」率領嫁晒人嘅灰姑娘、白雪公主、長髮公主同睡公主等保家衞國，呢隊由公主組成嘅「師奶兵團」實啱香港人嘅胃口啦！
一班師奶公主發威，史力加都唔執輸，繼續發揮佢搞笑本色，睇佢做湊仔公手忙腳亂，已經笑爆嘴，佢三個古靈精怪嘅BB真係遺傳老竇老母嘅肥嘟嘟綠色外形，但一樣可愛趣怪。出位配角驢友同貓貓亦都「出事」，佢哋誤中魔法調換身體就夠晒搞笑。
生力軍陳冠希
原裝配音班底有米克邁亞斯（MikeMyers）、金美侖戴雅絲（CameronDiaz）、愛廸梅菲（EddieMurphy）、安東尼奧班達拉斯（AntonioBanderas）同JustinTimberlake為新角色阿瑟王子配音，香港方面就由杜汶澤聲演史力加，張衛健為驢友配音，至於阿瑟王子嘅廣東話版就由靚仔陳冠希聲演。
話你知：本地薑省靚夢工場
除咗由動畫總監榮升聯合導演嘅許誠毅外，《史加力3》仲有唔少嚟自香港嘅幕後製作人參與製作，當中包括現為夢工場電腦動畫SupervisingAnimator嘅陳松年，同埋擔任動畫人物角色總監嘅張漢寧等，佢哋已經為夢工場嘅電腦動畫省靚招牌，套片由人物角色到服裝設計，大至公主嘅戲服，小至木偶仔畀薑餅人坐嘅孭帶都係一絲不苟，真係有辦你睇。
至於每一個場面除咗會先畫咗storyboard出嚟之外，仲要經過好多電腦CG繪圖步驟，然後又要加打燈、剪接等等效果，淨係史力B向老竇狂嘔嗰幕已經要花動畫師唔少心血同時間。