民主派六壯士下星期跳海爭普選，本來多一個馬丁，不過佢好謹慎，問過環保專家同乖仔、老婆意見後，決定唔濕身，喺岸上爭取民主都一樣啫。馬丁唔跳海，佢話因為前年世貿會議期間，韓農喺灣仔跳海抗議，事後好似有幾個人耳仔發炎，可見維港海水有幾污糟，專家都唔建議佢落水，屋企人更加反對，佢惟有隔岸觀水。
當時陪韓農跳海嘅inmedia成員葉寶琳話，維港海水真係幾臭，垃圾油污不在話下，最慘係上水後成身黐𣲷𣲷，好唔舒服，「落水後盡量唔好飲咁多水，否則肚痛就麻煩。」葉寶琳話有需要日後會再落水，「如果係有意義嘅，濕多次身有乜所謂？」
余若薇要先問冬冬
馬丁唔去馬，高達就猛落嘴頭掹其他人落水，佢話最想幾名民主派女將都下海，卿姐試過瞓街，跳海濕濕碎啦；譚香文係新一代民主女神，佢肯落水歡迎之至；公民黨黨魁余若薇話可以考慮吓，但要認真問問冬冬維港適唔適合游水，如果高官拍心口話得，都可以諗諗。民主黨主席仁哥今次唔落水，據講係因為04年跳海保皇后時，佢因不熟水性差啲出事，民主大業仲好需要佢，唔使咁快獻身住。