有報道話，有位仁兄入稟告香港寬頻，話對方損毀佢嘅電話同傳真系統，令佢冇得同全球嘅朋友通電話，要求賠償200億！
網友LILITH13喺《香港討論區》話，「咁都有得告，都算係一條財路喎！」儍佬講：「其實有乜咁出奇啫！早排喺美國夠有個法官話間洗衣舖整唔見佢條西褲，告對方要賠成億啦！」SPIRIT2008亦指：「可能精神上損失係無價呢！」
網友羅柏蘭登就諗到：「咁我成日入中銀個網買股票都入唔到去，令我飽食驚風散，咪可以告佢，要求賠番成幢中銀大廈畀我，補償吓我精神上嘅損失。」
如果將來下下上唔到網，或者喺網上做唔到買賣，都可以告上法庭申請索償，咁啲股票行同銀行咪好唔得閒！
http://www11.discuss.com.hk/viewthread.php?tid=4534703&extra=page%3D21&page=3