股市勁升，細價股大跌，有啲散戶輸到要喊。最近財務M到內地走咗一轉，收到大量詢問，問如何在港買殼上市，創業板嘅殼價話去到五千萬，主板殼價更係海鮮價，視乎業務與內部清潔狀況而定。
點解上市殼受歡迎呢？財務M話內地湧現大批民企可以上市，但中國證監會（CSRC）從嚴審核，最厲害一招就係查三代，問資金來源，第一桶金點樣出現，第一筆投資資金來自何人。民企邊度有完整答案呀，避之則吉。如果來港上市，亦要經CSRC批准，好煩啫！故此有啲香港醒目仔在內地教路，不如到香港買殼，故此近期一啲細價股升到飛起，事先毫無預兆。但一旦消息唔準，或者傾唔埋欄，股價就會大跌，散戶跟風上車嘅話，因住車毀人亡。
散戶邊會知道邊隻殼想出售呀？睇報紙先至知，已經太遲，但如果事先知道，搶先入市，就構成「內幕交易」，所以左丁山點都唔明白為何細價股可以突然勁升，而且有大量成交配合。假如呢類公司事後真係宣佈有重大交易嘅話，有關當局應該過問吓。
但世界上又真係有睇通水晶球嘅投資大師！最近一期《財富》雜誌訪問「價值投資大師」（valuemaestro）Jean-MarieEveillard，此君今年六十七歲，喺紐約做投資基金經理，過往二十六年來，每年投資回報率有15.8%，超過標準普爾五百指數嘅升幅13.7%，係了不起嘅成就。呢位大師喺梅鐸宣佈收購杜瓊斯之前，同一日內買入十萬股杜瓊斯股票，作價三十零蚊（美元），消息宣佈後，以五十幾蚊沽出，三四日間賺咗兩百幾萬美元。呢位E先生話：「奇怪嘅係，證監會冇打電話畀我，只有記者不斷追問！」
E先生話現時睇好日本，歐美股市已經高到冇乜價值，買黃金只係做股票對沖啫，銀行股，房地產股，私募基金等全部不宜投資。佢最過癮嘅評語就係話報紙股票好唔掂，因為美國啲傳統大報（以《紐約時報》為例）過份政治正確，悶到讀者暈，銷量大跌，反而《紐約太陽報》NewYorkSun夠膽出位就好掂嘞！