悠穎馳得閒會揸車同屋企人周圍去，睇吓有咩新食肆同Shopping；如果要數我最唔想去嘅，我諗都係葵芳新都會廣場喇，事關佢附近嘅交通情況極之恐怖！
話說噚晚揸車收工，諗住喺商場入面嘅上落客區放低個同事；點知轉咗入興寧路後，就見到好多的士泊晒喺路中心，唔單止阻住側邊小巴站嘅小巴出入，就連雙黃線同黃格仔都唔理一樣照泊，搞到面向葵涌廣場嘅車，要同對面線嘅車鬥快先可以駛過！放低同事再駛返入興寧路，除咗要避開嗰啲泊喺路邊嘅私家車同的士之外，最慘仲要睇住唔知喺邊度衝出嚟嘅行人，佢哋就算見到有車嚟緊，都話之你繼續慢慢行，人同車都咁恐怖。
其實悠穎馳想提吓身為行人嘅你，唔止唔可以亂過馬路外，仲有就係如果喺設有交通燈、行人天橋及行人隧道等行人過路設施嘅15米範圍內，不使用有關設施橫過馬路的話，可被警方提出檢控，最高可被判罰款$2,000㗎！
悠穎馳
豪邁不羈，愛車如命，聽幾下引擎聲就知咩車！