奔波世界，有大食大！對美式巡航電單車嚟講，巨大雄厚身形，霸氣絕對大殺四方。Kawasaki在Vulcan系列的中量入門級型號，加入另類異色，都係玩大佢，不過就玩埋大軨，薄胎包住21"鑄式輪圈，感覺大上加大，堪稱電單車界轆霸！
文：Monaco
攝影：伍慶泉
模特兒：Annie
鑄造21"大軨
要呈現大車氣度，除了車頭一個極浮誇21"輪圈，呢款Vulcan900C外形及動力心臟等部件，皆繼承自頂級版VN2000，夠誇啦。美洲中型車市場不斷擴展，但油價狂飆，使遠在美洲的大國民少了開車，多了坐公車，車廠要花盡心思拉攏車主。去年發佈新車預告時，VN900備受關注，新車搭載一系列頂級車配套：單一電鍍頭燈，大小適中的牛角，以大量電鍍材料佈置車身、錶板、輪框、前叉筒、排氣管等；而淚滴形油缸連電鍍徽章，手工更係一絲不苟，霸氣流線車形正係Vulcan900C過人之處。
重量入門級
撻車時排氣管的大容積吐出量，使人質疑Vulcan900C的中級身份。車廠公佈，它屬於車系1,500c.c.至2,000c.c.的入門座騎，是初階騎士操縱大巡航車前的最佳選擇。
車廠在車體設計上下了功夫，即使慢車時仍可以輕易應付。頭擔設定夠人性化，減去與車重搏鬥的駕駛方式，把手重量不如想像笨重，在慢速轉向時不會過份內傾。油門表現平滑，0-80km/h加速穩定；引擎附有自動轉速感應，同時會自動調校怠速。主動安全裝備足料，前後單碟煞配雙活塞卡鉗，對於巨大車體有着充足制動力。低重心車身配上正立套管前叉，車尾單筒式避震，雖然係傳統設定，不過有不俗穩定性。電鍍錶板置於油缸之上，簡單清晰顯示，方便後傾坐姿。
穩定豪邁巡航感
長軸距佈局配上V2引擎，躍躍欲動，爆發渾厚低轉扭力，充沛中轉域加速，直路巡航穩定，駕駛舒適。可惜，針無兩頭利，長軸距加車身，使轉向有欠靈活，窄路掉頭轉彎，須要落腳修正這部重量入門級。幸好，騎乘低重心車身，要完成這個修正動作，初哥也不會老鼠拉龜。傳動系統以皮帶連繫，比傳統鏈傳動車種，動力輸出更柔順，而且更經得起時間考驗。坐於寬闊座席，腳踏闊大腳踏，腿部一下子可以盡量伸展，手握曲張巨型把手，有稱心平衡感，感受四周注目禮，地上行車線隨流線車身掠去，豪邁巡航感覺不期然流露出來。
KawasakiVulcan900CustomSpecifications
引擎：水冷式4衝程V型雙汽缸SOHC
馬力：54ps/6,000rpm
扭力：8.4kgm/3,500rpm
傳動：手動5前速，皮帶傳動
車輛提供：25122228（泰力摩托車中心）