早前聯合國兒童基金（UNICEF）專家提出報告，表示6個月大的BB可以跳過唔食糊仔和粥仔階段，直接食固體食物。此理論引起各界議論紛紛，究竟6個月大的BB能否自行進食固體食物呢？Billboard找來6個月大BB卓晞測試10種固體食物，原來BB食到甜味食物，冇牙都會搏命咬，仲加埋口水溶咗佢吞落肚，究竟UNICEF個專家有冇試過㗎！
記者：區佩嫦
攝影：梁細權
Model：曾卓晞
TOP1 6個月BB可以食固體食物？
TOP1掂！ 香蕉
唔少專家話BB可以食香蕉，可惜隻蕉太重，要媽咪幫手拎住先可以放到入口。香蕉好滑，細細力咬就食到，不過BB鍾意放晒入口嗒吓嗒吓，好快變成香蕉茸！
記者註：BB食香蕉時個樣超冧！
TOP2掂！ 牙仔餅
6個月啱啱出牙仔，專登畀BB食餅亁「磨吓牙」。BB好鍾意食牙仔餅，一見姐姐拎出嚟，即刻搶上手放落口慢慢嗒，以口水嘅威力將餅整腍，然後先慢慢「咬」！
記者註：唔使3分鐘就食晒成塊，你話掂唔掂？
TOP3掂！ 熟甘笋
唔知係咪牙痕關係，BB鍾意煮熟咗嘅甘笋，用門牙仔磨吓磨吓變成甘笋茸。
記者註：食到唔捨得放手兼放口！
TOP4掂！ 豆腐
BB平日有媽咪剁爛嘅豆腐，但第一次大嚿餵畀BB食。BB對豆腐嘅興趣一般，大嚿細嚿都食得落！
記者註：BB一食豆腐就整個作嘔樣，最初以為佢哽親，原來只係扮嘢。
TOP5掂！ 雪糕（未溶㗎！）
雪糕係乜？BB咁大個都係第一次見，嘩！原來咁凍冰冰，拎上身都特別爽，啱晒攝氏30幾度嘅天氣食。不過食完變咗污糟貓，媽咪話有排抹！
記者註：最初以為BB怕凍會擲杯雪糕落地，點知拎到唔捨得放手，仲要食到嗒嗒聲，真係好鍾意咁噃！
TOP1唔得！ 無邊白麵包
第一次食白麵包，大大塊好易拎上手，但麵包又亁又無味道，BB唔鍾意食！「唔好再迫我食好冇？」
記者註：白麵包好快俾BB撕成麵包碎，視為玩具多於食物！
TOP2唔得！ 去骨魚肉
BB第一次食去咗骨嘅魚肉，仲要係鯇魚腩，OhNo！Hedoesn'tlikefish！
記者註：BB點都唔肯擘大口食魚肉，唔通整得唔好食？
TOP3唔得！ 熟西生菜
BB今日第一次拎住成條菜慢慢「嗅」，先用條脷試吓先！不過無牙仔都係咬唔開條菜！
記者註：BB將條菜放落口後都𦧲番出嚟，可能纖維太勁，咬唔開！
TOP4唔得！ 橙
橙就見得多，食都係第一次，聞吓先，味道好似好甜，不過質感怪怪哋，滑潺潺仲要一用力就整到通手都係汁，又易爛，唔食！
記者註：一拎上手就將塊橙一開二，唔夠一分鐘就丟落地，你話BB鍾唔鍾意呢？
TOP5唔得！ 榴槤
嘩！榴槤味好臭呀，拎上手感覺好怪，唔食！
記者註：為咗測試，媽咪將細細嚿嘅榴槤放喺BB嘴邊，BB點都唔肯放入口中，經過3分鐘的拉鋸，宣佈投降！
Billboard結果
同牙力冇關，口水係最強武器。
TOP2 做完LASIK笨豬跳會爆眼？
有新聞話美國有人做完LASIK去攀山，竟因氣壓問題令視力變差，吓？但眼科專科陳醫生話，其實冇咁危險，但做完LASIK，轉個頭去玩笨豬跳的話，很大機會跳爆眼㗎﹗
記者︰劉昱蘭
攝影︰陳偉強
Model︰Ruby、Kathy
鳴謝︰眼科專科陳浩然醫生
陳醫生舉出的醫學報告：
Case1︰喺葡萄牙試過有個23歲女仔，玩笨豬跳前健康正常，一跳完隻眼就出事，結果發現右眼視網膜表皮出血。
Case2︰都係葡萄牙，有個事前全冇眼疾嘅48歲女人，笨豬跳後雙眼眼球內後部嘅血管出血而視力受損。
手術後角膜薄咗易出事
LASIK用激光改變眼角膜弧度矯視，其間攞走咗角膜組織，令角膜薄咗同脆弱咗。美國個Case係個人行到16,000米高，突然視力變差啫，而香港最高都係3,000米，問題唔大。不過就算冇LASIK，玩笨豬跳都有機會會爆眼。「跳到落底時，血液集中晒喺頭部，當度力扯番上去，血仍然係向下走，血湧向頭令眼晴血管受唔住咁大嘅壓力而爆裂，好彩嘅就短暫失明，爆得緊要就會永久失明。出事機會同角膜厚薄有關，所以唔單止做完LASIK易出事，深近視嘅人（超過800度）都要小心，近視嘅人眼球出啲嘅角膜組織都係薄咗㗎。」點預防？
答案係：「冇」，呢啲物理現象係冇嘢可以阻止嘅。
Billboard有嘢問：坐飛機得唔得？
問︰咁玩跳樓機都係好高好快咁衝落嚟喎，會唔會出事？
陳醫生︰跳樓機唔係頭向下（暫未有頭向下咁激），而且跳樓機有機械磨擦，衝力冇完全FreeFall嘅笨豬跳咁大嘅，可以放心。
問︰做完LASIK最好隔幾耐先玩笨豬跳比較好？
陳醫生︰最好唔好玩，如果堅持，都係等3個月後先玩比較妥當。
問︰做完LASIK係咪唔好坐飛機？
陳醫生︰雖然高飛好似有危險，但機艙內氣壓同溫度都好穩定，所以冇乜影響，做完手術第二日就可以搭。
你敢唔敢搵眼博？
其他9大創傷眼睛高危運動
Top2︰壁球、羽毛球－球底大小同人眼差唔多，好易打中隻眼珠。
Top3︰籃球－多數被對手手指篤親眼角膜。
Top4︰水上運動－被水珠打中隻眼。
Top5︰足球－個波高速撞到眼。
Top6︰排球－同樣係個波太快。
Top7︰冰上曲棍球－喺加拿大試過擊斃觀眾……
Top8︰拳擊－震到視網膜脫落。
Top9︰長曲棍球－大多係練習時冇戴保護鏡而受傷。
Top10︰騎馬－隻馬踏起啲泥或石頭高速打中隻眼。
Billboard結果
冇做LASIK一樣咁危險。
TOP3 自創「08奧運概念股」有得炒？
近期好多師奶都自創「福娃08奧運概念股」，係咪真係得㗎？就等新鴻基證券策略師彭偉新Check吓呢10隻師奶熱炒奧運股有乜潛力。
HOT1 8157.HK首都信息發展股份有限公司
52周最高升幅：8.61倍
上星期收市：$0.71
雖有個多語言研發項目，但已經係一段時間以前嘅Project，項目嘅影響已經反映晒出嚟，暫時未見同奧運有關嘅實質發展。
建議買入價︰$0.66
止賺︰$1
止蝕︰$0.6
HOT2 0154.HK北京發展（香港）有限公司
52周最高升幅：6.51倍
上星期收市：$4.55
佢哋用「福娃」Logo出智能卡固然係優勢，而且喺非奧運投資方面，開發緊國內地鐵內嘅流動電話網絡「一網通」，呢方面嘅收益將會更大，可以睇好。
建議買入價︰$4
止賺︰$5.8
止蝕︰$3.6
HOT3 0670.HK中國東方航空股份有限公司
52周最高升幅：2.81倍
5月21日收市：$3.73
08奧運的確會令航空人流多咗，但呢隻股停咗牌好耐，好難估佢開番會係乜價位。
建議買入價︰$4
止賺︰$5.7
止蝕︰$3.5
HOT4 0544.HK大同集團有限公司
52周升幅：2.76倍
上星期收市：$0.147
呢隻工業類股份未攞到實質同奧運相關嘅業務，唔係好抵玩，如果真係想炒，最好都係低水平先買。
建議買入價︰$0.13
止賺︰$0.2
止蝕︰$0.1
HOT5 0588.HK北京北辰實業有限公司
52周最高升幅：2.6倍
上星期收市：$6.14
北辰有份管理奧運村，籌集超過14億用喺奧林匹克公園國家會議中心同配套設施工程，會受惠於08奧運，但內地房地產有宏調，短期內未必有乜上落。
建議買入價︰$5.4
止賺︰$6-6.2
止蝕︰$5.15
HOT6 8095.HK北京北大青鳥環宇科技股份有限公司
52周最高升幅：2.44倍
上星期收市：$0.97
同奧運都無乜直接關係，唔建議作為08奧運概念股而入手。
唔建議作為奧運概念股。
HOT7 0694.HK北京首都國際機場股份有限公司
52周最高升幅：1.65倍
上星期收市：$11.16
北京機場航空運量已經差唔多去到盡，飛機架次好難多得去邊，佢會因奧運受惠，但唔會影響好大。
建議買入價︰$10
止賺︰$12
止蝕︰$9
HOT8 0392.HK北京控股有限公司
52周最高升幅：1.37倍
上星期收市：$28.75
呢隻綜合類股份頗多基建項目，政府逐步畀錢出嚟畀佢開發新Project，所以會多咗生意，而且基建類嘅市盈率高啲，值得玩吓。
建議買入價︰$26
止賺︰$35
止蝕︰$23
HOT9 8245.HK北京京客隆商業集團股份有限公司
52周最高升幅：0.74倍
上星期收市：$7.09
超級市場唔會係遊客消費得好勁嘅地方，多咗遊人同超市多咗生意冇乜必然關係，唔建議作為08奧運概念股而入手。
唔建議作為奧運概念股。
HOT10 0715.HK和記港陸
52周最高升幅：0.44倍
上星期收市：$0.66
雖然係有吉祥物「福娃」嘅特許製造及分銷權，但其實都係一啲小型生意，而且內地嘅侵權情況咁嚴重，對佢哋嘅生意都係一個打擊。
建議買入價︰$0.6
止賺︰$0.8
止蝕︰$0.55
Billboard結果
有啲根本同奧運冇關，未必升㗎。