究竟專恰新抱嘅奶奶有冇樣睇？塊面瘦到苦瓜亁咁，Bingo！眉心窄到1cm都無，Bingo！若果有齊以下五個特徵，真係奇遇，咁惡搞嘅奶奶都遇到。作為新抱，可以擺個風水陣化解奶奶嘅「戾氣」，只要喺屋入面望住大門，喺大門右邊放幅老虎畫或一尊老虎像，（最好咆哮緊嘅樣），就可治到呢個麻煩奶奶。
記者：區佩嫦
資料提供：方海閱（http://www.fonghoiyue.com.hk）
綜合TOP5人辦
Top1 苦瓜臉惡奶奶 搵老虎對付
𠵱家人人都話減肥，搞到兩邊面凹晒，雖然瘦身成功，人際運就變得麻麻。若你奶奶塊面好似苦瓜亁咁，無乜肉地，正所謂「面無三両肉」，呢啲人嘅際遇往往唔多順暢，會將抑鬱積喺心底，漸漸唔信人，仲會養成挑剔、腌尖嘅性格，較難與別人相處。
化解方法︰唯一嘅辦法係多包容、多關懷佢，解除佢心中嘅鬱悶。
Top2 眼珠細自私自利
雙眼特別是眼珠，可睇到人嘅性格。惡死奶奶其中一個特徵就係眼珠細，眼珠細嘅人較自私自利，心地亦麻麻，有時明知自己唔啱，但都會惡人先告狀，鬧你一餐，鬧完你後仲喺你老公面前話你嘅不是，搞到你老公夾住喺你倆中間，左右做人難。
化解方法：不妨幫奶奶配番副眼鏡減一減佢嘅「惡性」，多睇導人向善嘅書都有一定幫助。
Top3 兩眉窄疑心大
兩眉間可以放得落兩隻手指代表正常，若少於兩隻手指為之窄，兩眉窄嘅人，疑心大、妒忌心重，容易為芝麻綠豆嘅事而嘈到坼天，搞到家無寧日。若果兩邊眉毛好似連成一線，情況就更加嚴重，小心。
化解方法︰帶奶奶去做Facial，要求美容師將太近眉心位置嘅眉毛拔掉，令眉心較開闊，人亦開朗啲。
Top4 頸粗髮硬強詞奪理
頸粗嘅人說話時會青筋暴現，講嘢粗聲粗氣、強詞奪理；頭髮粗硬嘅人就性格剛烈、喜惡分明，即使為佢做咗很多嘢，若佢不喜歡，唔感激仲話你辦事不力，將你鬧到狗血淋頭。
化解方法︰帶奶奶去焗油恤髮，令頭髮變柔順，仲要佢多食素、多睇宗教書有助心境平和。
Top5鼻頭無肉生性刻薄
如果鼻頭無肉、鼻翼尖削，佢性格較為剛烈、固執，為人較陰險卑鄙，愛計算別人，可以話係小人的典範。
化解方法︰不妨帶奶奶去參加啲宗教活動，好似放生等，以宗教「馴服」奶奶。
Top5易話為奶奶
Top1 面圓有肉易相處
面圓嘅人給人有福氣嘅感覺，原來喺面相嚟講，的確係比面尖瘦嘅人有福。人有福氣性格自然較開朗，容易與人相處，又鍾意聽啲讚美嘅說話，只要多落嘴頭，𠱁得奶奶開心，一定會有回報。
Top2 唇正牙齊有信用
若果你奶奶的唇形四正兼無歪斜，牙齒又整齊嘅話，代表為人講信用，絕對唔會口是心非，會為自己嘅說話負責任，是位極具權威嘅人，屋企自然唔會有是是非非嘅出現。
Top3 龍舟口屋企靠山
嘴角兩邊似龍舟向上彎，稱為「龍舟嘴」，呢種口形嘅人除咗有「食神」、衣食無憂，人緣亦好好。呢種奶奶性格樂觀，為他人設想，責任心重，應承做嘅嘢，永無「甩拖」，可以話係屋企人嘅好「靠山」！
Top4眼大帶笑心地善良
眼珠細嘅人性格較自私自利，相反，眼珠大嘅人則心地善良，樂於助人，是一位容易相處嘅人。若果你奶奶對眼眼珠大，兼且雙眼經常好似笑緊咁，恭喜你，你奶奶會極之錫你，更會視你如己出，唔會無事生非！
Top5
髮幼眉齊細心溫柔
頭髮柔軟代表為人溫柔，容易遷就別人，不會擺奶奶款，要媳婦放工煮飯打掃兼服侍奶奶。而眉毛齊整眉形靚嘅話，代表思想清晰，情緒穩定，唔會為家人帶嚟麻煩，兼會為子女兒孫打算。
