月亮！令人好多聯想空間，人狼、太空競賽、嫦娥？Nokia新返一部8600以Luna命名（即月亮）；秉承8系貴氣傳統，不銹鋼×玻璃機身，冇乜特別功能開賣$6,398，極狼！不過明顯走「行頭」機路線，出得嚟Walk者，有邊個唔想搶先登陸呢個「月球」；6千幾都唔買齊料PDA手機，只係為咗出嚟「晒」月光？呢個月亮都算狼，不過擺明狼嚎咁嘅價，都一樣不乏老細靚女追捧！
記者：馬靜兒
攝影：陳偉強 Model：JoeyMo
玻璃不銹鋼 顯貴氣
簡約、純黑、貴氣係8600望落第一眼嘅感覺！攞上手，手指頭傳來不銹鋼機身特有的冰冷、重量質感，相對平日用開的膠殼機，脫口而出：「此機非池中物」！
輕推芒底，機頂猝然彈起，感覺好Firm毫不怱忙；不經意瞄上KeyPad位一眼，有如煙熏微黑的鍵盤蓋，竟然是以玻璃物料所打造，輕輕滲射而出的數字鍵微光，有如新月般感覺清新；但背上冒出一股寒意！唔知唔小心跌落地，會唔會好容易打爛呢？真係要小心一點！
推蓋設計，鍵盤平日收在玻璃下，但設計特別之處是，隔着玻璃，鍵盤每隔數秒，就自動發光；加上來電未響時，屏幕先會出現Screensaver的閃光，感覺就好似心跳一樣，加上黑色機身，真的有點似黑夜中的月亮。難怪機名叫Luna。
功能基本冇插卡
至於基本功能方面，8600屬GSM四頻手機，內置200萬像素相機；用上1,670萬色的QVGA屏幕，影像都算夠立體又好色。聽歌、影相、拍短片都齊備，也有FM收音機。機身左右都有立體聲喇叭，聽歌的音質都算不俗。
但沒有支援任何記憶卡插槽，機身內置128MB記憶，其實真的不大夠用，每次要用microUSB過歌、過相，對於習慣將相和歌存入記憶卡備的人有點不大方便。
價錢夠狼
以價而論！「齋版」功能的8600，竟跟有機王之稱的N95價錢只差數百元，但論功能，N95就明顯較8600優勝好多；至少N95有500萬像素鏡頭、GPS衞星導航、支持HSDPA上網，吸引力強好多。
8600定價略嫌狼了一點，但對某些人嚟講，貴價手機系列是身份象徵，手機影相、上網不是他們關心的重點，最重要是手持貴價手機那份晒命感覺。相比起賣價以萬元計算的Vertu手機，8600價錢已經比較相宜。
願意出幾多錢買
Isis：好高貴Feel，好有手感，喜歡佢嘅質地，唔似一般膠殼機。好Cool！
Joey：呢部貴機？好重手喎！用埋玻璃，其他機好少見。外形高貴，最啱晒命！
Kinki：我喜歡佢用玻璃面，好似好High。鍵盤位又間中發光，真係幾似月亮。
Hibernia：玻璃嚟㗎？會唔會跌落地㗎？無插卡？好麻煩喎！不過，部機好靚！
後記
話說記者測試過程中，竟然發生了一段幾米式「月亮不見了」的插曲！原來係家中「嫦娥」一見到部機，馬上攞咗去「奔月」，朋友面前晒「月光」！好彩虛驚一場。
老實講！咁獨特機身設計，發覺好多雌性動物都難逃佢魅力！至於好多後生機迷估價偏低，係唔明市場區間同定位；須知好多老細級手機用戶，都係Nokia擁躉，成功之處係愛佢功能簡單！玩上網、多媒體，請買PDA手機，老細愛嘅係簡單易用、打出打入，同貴氣感覺，由鬚刨王8810年代已經係呢個致勝法門。
Profile
制式：GSM四頻
介面：S40
屏幕：1,670萬色（320×240）/2吋
相機：200萬像素
變焦：4倍數碼
影像格式：JPEG、GIF、BMP、PNG
短片：3GPP、H.263及H.264
聽歌：支援AAC、AAC+、eAAC+、MP3、MIDI、AMR、WMA，及內置FM收音機
儲存：128MB內置記憶
體積：107×45×15.9mm
重量：140g
查詢：21366338