財務M與貿易C在六月初回鄉──溫哥華探親，返到香港，成個人輕鬆晒，想來係鄉下空氣好，環境好，冇咁緊張也。財務M就話：「唔係咁好啫，成日落雨，落個不停，想打波都唔得。」兩人異口同聲咁話，溫哥華啲屋價升到飛起，卑詩省哥倫比亞大學附近一啲半獨立屋叫價一百九十萬加元，以當地平均屋價嚟講，貴到離譜。財務M話香港地產商在溫哥華開發唔少豪宅項目，針對大陸移民（港燦未必有錢），高樓大廈香港式豪宅會賣到一千萬加元咁巴閉！
大陸人大把錢，住貴屋唔會計較。財務M做中間大陸投資，以前好受內地民企歡迎，現時就逐漸冇人睬，嫌佢唔係美國大名牌例如「黑石」嗰類。財務M自溫哥華回來，比較吓佢近年在大陸「走埠」所見到嘅環境，感慨甚多，譬如太湖，豈止湖水污染，太湖周邊都係工廠，有時煙塵蓋天，乜都睇唔見。江浙之間，目前最好空氣嘅係寧波，城市三面向海，有天然良港，環境仲係保持得好好，但六月份滬甬（上海寧波）大橋通車後，往來上海固然甚為方便，但隨之而來嘅係大量汽車排放，以後寧波空氣能否保持亁淨，不甚樂觀。
財務M話：「商場上浙江人慣於貿易貿運，經營工業，不如江蘇人，故此今日江蘇富，浙江窮；江蘇污染，浙江潔淨（不過西湖亦已受破壞）。今天中國最弊就係爭取經濟增長之餘，無法同時保護環境。」貿易C即刻講：「我哋成班校友在北美重聚。飛去阿拉斯加上船遊覽北方冰川，再沿岸南下到溫哥華，三年前我去過一次，今年所見，冰川萎縮，睇落全球暖化破壞環境，令冰川面積不斷縮小。」
坐郵船遊冰川，會否破壞環境？財務M笑曰：「你哋咁多人遊冰川，郵船加遊客，排放不少二氧化碳，你哋都係破壞冰川之人也！」貿易M連忙抗議：「每年遊冰川，五月中開始，七八月係旺季，都唔係咁多人啫！」歷年加加埋埋就人多嘅啦，正是小數怕長計，人嘅矛盾之一就係一方面叫喊保護冰川，一方面就要遊覽冰川。