唔少人想創業做老闆，但商場如戰場，如果創業初期籌備工作做得唔好，隨時血本無歸不特止，仲可能要加盟失業大軍。《CNNMoney.com》就列咗4個基本功畀創業者參考：
1.做兩份工
萬事起頭難，最好就係邊打工邊創業，起碼有穩定收入支持你上戰場攞經驗。如果你決定辭咗份工，專心搞生意，為咗減低風險，最好都係畀錢請專家或顧問幫手。假如你想搞嘅生意唔係自己本身從事嘅行業，都係先喺嗰行搵份兼職做吓先好啲！
2.儲錢生活
打工有固定收入，但做生意收入就唔多穩定，所以開業前最好計清楚自己同屋企人每月開支，最好儲定足夠應付一年嘅生活費。另一個確保生活質素唔受創業影響嘅方法，就係搵定份兼職幫補，以免生意入不敷支時陣腳大亂。
3.與人分享
好多人想自己做老闆係因為自由度大，唔想限時限刻返公司報到，但現實係做生意分秒必爭，尤其當生意未上軌道前，你要付出嘅時間可能比打工時更長。
因此，你最好先同屋企人溝通，話畀佢哋知你未必可以成日陪佢哋。亦都可以順便問吓佢哋嘅意見，集思廣益。
4.搞好福利
健康就是財富，記得買定份醫療保險。如果間公司聘有員工，可以改買團體保險，慳唔少保費！