唔知點解，博彩業嘅猛人，硬係零舍寸嘴。香港有退休牙擦練馬師簡炳墀，澳門有賭王何鴻燊，仲卧虎藏龍有個寸嘴藝術精湛嘅高手，就係永利大老闆、拉斯維加斯之父史提芬永利（SteveWynn）個得力助手，澳門永利賭場嘅總裁簡博賢GrantBowie。八方噚日有幸同簡博賢同枱食飯，論盡澳門賭業大勢，談吐優雅嘅佢，口才出神入化，牙擦程度不下於本地薑新界簡，連環「寸笑」行家唔怕辣㷫人，不過呢位過江龍澳洲簡寸得嚟彬彬有禮，吹佢唔脹嗰隻。
以前葡京烏煙瘴氣
話說何鴻燊今年2月喺新葡京開幕嘅時候，睩到對眼好大咁話，佢旗下嘅澳博佔咗澳門賭場六成幾生意，其餘對手冇得追。澳洲簡就話賭王嘅數字係錯嘅，查實澳博市佔率一半都冇。講開賭王，澳洲簡大讚老人家厲害，成功喺澳門打下賭業江山，不過讚唔夠兩句，又踩番幾腳。澳洲簡話，澳門賭權開放之前，做賭場好容易，乜都唔使諗坐喺度收錢，"Hejustgavecustomerswhathewantedtogive.（佢畀乜，賭客就有乜。）"澳洲簡話八年前去過舊葡京，賭場烏煙瘴氣，都唔知啲客點解頂得順；開放賭權後唔同晒，過江龍引入拉斯維加斯嘅優質服務，澳門賭業形象脫胎換骨。
寸威尼斯人太巨型
寸完葡京，澳洲簡又踩金沙。威尼斯人渡假村最近狂谷宣傳，以五星級酒店同國際名牌做噱頭，擺明硬撼走高檔路線嘅永利。澳洲簡擺出一副未驚過嘅姿態，佢話金光大道真係好巨型，渡假村3,000間房，淨係checkincounter都有15個，之但係客人鍾唔鍾意咁熱鬧，就係客人嘅選擇；言下之意，高貴嘅客人要貼身服務，始終都會揀番高貴嘅永利咁話。
最好笑係講到新開冇耐、使成千萬請發哥賣廣告嘅皇冠賭場酒店，澳洲簡流露出唔知係同情定歧視嘅眼光話，皇冠係一間好tough嘅賭場，事關佢嘅地盤面積奀豬，要起幢高樓大廈做賭場；永利就唔同，賭場只會起喺地面。即係話，皇冠犯咗賭客唔鍾意撐樓梯賭錢嘅大忌。聽完澳洲簡講咗一大輪之後，八方恍然大悟，決定都係留港消費，今日買10蚊三T，唔使煩。