新Game王：古典音樂辟邪<br>扮蕭邦殺妖魔

新Game王：古典音樂辟邪
扮蕭邦殺妖魔

你問我呢類熱血青年會唔會坐定定陪你欣賞蕭邦音樂？梗係no啦！不過XB360就認真沙膽，居然推出一款以蕭邦做主角嘅ARPG（動作＋角色扮演遊戲）──《TRUSTYBELL蕭邦之夢》。玩法並唔似鋼琴機考吓反應就算，而是有晒故事、劇情、戰鬥策略，而蕭邦更會帶領一班兄弟殺入邪惡政府總部。雖是以暴易暴，但好多謎題都要憑音樂知識解決，建議各位買定一對高音甜、中音準、低音勁嘅喇叭，慢慢欣賞呢隻遊戲！
記者：陳國輝

靚仔版
相似度：10%

最後一個夢……

故事發生於1849年秋天，波蘭天才鋼琴家蕭邦在即將離世前，突然夢見佢最後一個夢。在夢境裏，所有患上不治之症嘅病人，都擁有神奇魔法，可以替人治病；與此同時，佢仲遇上一名同病相憐嘅女仔POLKA，為咗扭轉兩人嘅命運，於是展開遊戲嘅序幕。

■夢境內，蕭邦拎住支指揮棒就可以使出超強魔法。

考你音樂造詣

表面上，《蕭邦之夢》係一隻動作＋角色扮演嘅遊戲，玩家需要不斷儲經驗值，提升level，才能對付大佬；但實則故事內容與音樂有非常密切關係，例如場景配樂、戰鬥方式，甚至故事解謎部份，都流露出蕭邦作品嘅特色，甚至牽涉樂理範疇。能唔能夠完成遊戲，就要睇你嘅音樂造詣有幾高喇！

■在現實世界，所有嘢只係一場夢，蕭邦仍然卧病在床。

■由於女主角POLKA同樣患有不治之症，令蕭邦看透人生。

以樂理術語命名

玩不同地形是每隻RPG遊戲嘅特色，《蕭邦之夢》用上3D構圖，加上簡單嘅日式動畫風格，雖然靚，但唔算極品。不得不提係故事裏面嘅人名、地名以及招式名稱，全冠以樂理術語，例如男主角ALLEGRETTO，意思解作「快板」；另外，有個大草原叫RITARDANDO，意思係漸慢速度，當玩家進入呢啲場景時，遊戲就會奏出一段合乎天時、地利、人和嘅蕭邦作品，勁有mood。

■感覺休閒舒適嘅地方，叫RITARDANDO（漸慢速度）。

■隨時執到「ScorePeace」樂譜碎片，便可進行演奏，獲取特別道具。　

分個人及團體等級

《蕭邦之夢》另一特色，係戰鬥風格會隨時間而改變，遊戲分個人和團體等級兩種：個人等級，即角色升level後，其生命值、攻擊力以及防衞力都會提升；團體等級則指擊敗Boss後，所有成員都會一齊提升level，當團體等級為Level1，戰鬥會採取簡單回合制，玩家會有時間部署；升上Level2後，則演變成即時戰鬥模式，所有策略要即時決定。