因為先後提出收購雷丁同伯明翰城兩支英超聯球隊，令到前澎馬流浪班主楊家誠（圖右）人氣急升，被受傳媒關注。但查實佢嘅股壇都好活躍，只係低調得多。不過泓鋒國際噚日公佈以每股0.57元，發行1.152億股畀一間叫鴻祥管理嘅公司，涉資幾千萬，係濕碎料，不過，原來呢間公司由楊家誠全資擁有，咁新聞價值即時又唔同晒。
楊家誠今次入股泓鋒國際，佔間公司擴大後股本16.67%，變成主要股東㖭。
泓鋒嘅業務主要係做服裝採購、貿易等，舊年9月底止半年業績虧損327.7萬。間公司喺02年上市，但當創辦人兼主席蕭國建喺03年底去世後，間公司就有好多人事更替，點解楊家誠會睇中呢間公司呢？認真耐人尋味。
不過，楊家誠都有揸住幾間本港公司股份，包括超諾國際、環球能源控股、環球資產管理，04年曾被證監會檢控，指佢01年曾5次持有易達興業（現稱中國水務）已發行股本超過20%，但冇出過聲，違反權益披露條例，罰款4.3萬元；至於告佢操縱市場就罪名不成立。可能因為受過教訓，今次入股泓鋒國際做股東都出番張通告。
[email protected]