《槍神》班底陣容夠晒鼎盛，遊戲將會由吳宇森親自監製，內容包括故事、鏡頭運用都會給予專業意見，可以預期遊戲會充滿吳宇森嗰種特別「拍攝手法」，同時間遊戲廠商亦請到周潤發飾演遊戲主角，從現時官方發佈相片所見，以3D貼圖而成的周潤發，都幾似模似樣，而且發哥更會親自為主角配音，不過暫時未知發哥會用英文定廣東話喇！
《槍神》其實係改編自發哥主演嘅《辣手神探》，同樣係由吳宇森執導，遊戲故事主線係發哥為救被犯罪組織擄走的家人，要單人匹馬一味殺，直至殺到打倒首腦為止，雖然聽落無咩新意，不過遊戲當中會要玩家走上欄杆上奔跑、準確射擊等，最過癮莫過於遊戲內有減緩時間系統，開啓之後會出現吳宇森嗰種慢動作鏡頭，這時要瞄準或閃避都有充足時間！喜歡周圍射嘅破壞型玩家，《槍神》將會給你盡情發洩機會，遊戲所經之處幾乎都可以破壞，包你打到爽。預定8月推出，會有PC、PS3及XB360等多個版本。
記者：許福合
官方網站： http://www.midway.com/rxpage/Game_Stranglehold.html