時間：上午11時，烈日當空。地點：西貢大網仔路，路窄彎多。一架形態剽悍嘅灰黑色跑車一支箭咁喺樹蔭間穿梭。嘩，型爆！咦，唔妥噃，日光日白就飆車？睇真啲，車身修長，仲有大大個尾箱……原來係全新揭背旅行車Alfa159Sportwagon，樣惡唔係事必要飆車嘅！明白晒，咁好天，梗係要揸架旅行車去郊外兜兜風！
記者：黎頌詩（C記）
攝影：譚盈傑
Model：Catherine
一車兩味虛榮兼實用
今日好興奮，因為揸車技術平平嘅我終於有機會扮賽車手啦！呢份虛榮感，完全係來自Alfa159Sportwagon設計得如獵食夜鷹般嘅車頭，相比起幾年前推出嘅156，霸氣大大提升。Alfa招牌嘅鷹嘴設計更加向前凸出，襯上網紋鬼面罩，車頭燈每邊一開三，睇落似炯炯有神嘅鷹眼，講氣勢，一流！車尾加咗擾流裝置，煞車燈兩邊上揚，似怒目而視，跑味更濃！換個角度，側睇車身，感覺完全唔同，線條流麗，成架車即時溫馴晒，加埋車頂旅行架裝置，旅行車Feel即時出晒嚟！奇就奇在一車兩味，配合得夠和諧，一次過滿足你虛榮兼實用感。
軚盤轉波需時習慣
扮車手唔可以只係虛有其表，唔鍊番兩轉又點似樣？點都要棄用自動波，試試Selespeed個加減波箱。第一次揸，用軚盤旁嘅轉波撥片嚟升波拖波，感覺有啲唔習慣，起步同轉波都唔係太流暢，嘩，斜路開車仲溜後㖭，好失威呀！當然呢個只係小妹嘅技術問題，查實整套波箱感覺頗敏感，只係需要時間去熟習；原來波箱係偏向棍波設計，斜路開車一定要畀油。揸多幾公里，操控開始有頭緒，頻頻轉波再拖兩拖，轉檔嘅反應相當明顯，有晒揸手波車嘅樂趣，好滿足。只係，唔夠幾分鐘，前面竟然塞車，咪講笑，嗱嗱聲換番自動波！
尾箱靈活載物一流
有辣爆外形、Selespeed加減波嘅駕駛樂趣，一身跑格仲伸延入內櫳。較156而言，軚盤設計煥然一新，全真皮裝飾，銀黑相襯好搶眼，儀錶底板亦換上全銀色，最特別係兩列3圓孔式冷氣送風口同顯示錶，同車頭燈設計夠晒呼應，由外到內，過足車手癮。可能係跑車型設計車身較低，司機位嘅空間感似乎有點不足，C記呢類瘦人坐落都只係啱啱好，同事D先生就有點……扮完嘢啦，唔好忘記Alfa159Sportwagon始終係架旅行車，一樣有旅行車內櫳陳設變換靈活嘅優點，如後排中央都設有後枕，就算坐中間位都唔會閉翳。將後排座位拉低，尾箱容量即時由445公升大增至1,235公升，大大件旅行篋、單車都一樣放得落，最緊要我去Joyce、I.T.時，可以毫無牽掛咁一袋二袋掃貨！
實試短評
C記：「外形殺晒！有旅行車嘅實用，但又有非一般嘅辛辣賣相，夠特別。至於Selespeed波箱，無疑係好有Control樂趣，不過香港車多人多，用得唔夠痛快。」
Dennis：「2.2JTS引擎反應快，熟習咗Selespeed波箱運作，揸落仲好有跑車Feel㖭；不過，身形龐大如我就覺得好逼，兼有些少頂頭。」
Alfa159Sportwagon規格
引擎：2,199c.c.直4
馬力：185bhp/6,500rpm
扭力：230Nm/4,500rpm
傳動：6前速自動波＋Selespeed加減波
查詢：AutoSportivaLimited（28778788）