上個禮拜約咗朋友N食飯，兩支公一路揸車一路諗去邊度食，但諗嚟諗去都諗唔到去邊好，架車都去到九龍灣，咁就不如去呢期好Hit嘅megaBOX搵嘢食，順便逛吓呢個號稱全港最大兼咩都有嘅商場。
之前有好多News話megaBOX入面個停車場都幾難泊，但講真我又無呢個感覺，可能係同平日夜晚有關啦，而我哋仲特登有低層數嘅車位唔泊，泊到去有咁高得咁高嘅15樓。起初都仲覺得啲行車通道好闊，就算揸住部大Benz上去都無問題，但越上就越窄，不過小心啲對頭車嘅話，就可以輕輕鬆鬆咁上咗去。
免費飛手續超麻煩
上到去啲車位同通道都算闊，不過啲車用出口嘅指示牌就似乎唔多夠同唔清楚啦！跟住兩個人食完飯走人，諗住去設喺地下、3/F同10/F嘅顧客服務台，登記佢哋嗰個只要喺場中消費，就可以有最高3小時免費泊車嘅優惠。嗰一刻以為用八達通卡入閘嘅我，喺嗰度拎張卡出嚟「咇一咇」就得，點知喺Counter嗰位靚女話：「先生，你先俾張商舖發票我蓋個印，然後再俾張免費泊車飛你，出閘嗰陣先插入呢張免費飛，然後再拍八達通卡就OK㗎啦！」嘩，好複雜啫！好在係免費泊車同閘口有保安員叔叔幫手，如果唔係下次都咪搞我。
記者、攝影：鄭達基