端午節嗰日，悠穎馳同班朋友入咗大嶼山遠足，行過其中一段山路時，真係俾一組路牌笑到肚都攣埋！
話說嗰日行到去大嶼山嶼南路近荔枝園村附近，一個睇落唔係好急嘅彎位，竟然一次過見到29個「急彎警示」嘅箭嘴路牌，裝喺兩支街燈中間嘅一段路上，實在壯觀得嚟亦相當搞笑！
事關悠穎馳揸咗車十幾年，就算再斜再急、甚至連U-Turn大急彎都有嘅荃錦公路，都無見過有關當局，一次過裝咁多急彎路牌喺同一段路上面。
莫非當局驚行經嗰度嘅駕駛者，唔知嗰度係彎位而特別裝咁多個路牌嚟提醒佢哋？不過點都好，有關當局咁做其實都係一件好事，但就唔該喺其他地區都係咁做囉！
悠穎馳
豪邁不羈，愛車如命，聽幾下引擎聲就知咩車！