中國財雄勢大，已經唔係「東亞病夫」，好似早排內地A股打個乞嗤，美國同香港股市跟住跌，日股喺亞太區內幾乎冇人提咁滯。唔知係咪長期發唔到圍谷住道氣，日資嘅野村資本市場研究所噚日喺香港嘅研討會，討論正題雖則係中國經濟展望，但就完全不着邊際。之不過，華人講者嘅高級研究員關志雄主力揼出嚟嘅報告，竟然批咗三個驚世預言，華華睇到眼都突埋，唔通野村唔想喺內地掘金？
六個論點支持
野村摸住水晶球批斷，喺2050年前中國會有三大勁爆新聞，最碎料嘅係阿爺GDP超越美國成為全球一哥，其次可能係美國佬至驚嘅──大陸台灣和平統一。最最最勁嘅係「共產黨的獨裁統治終結」，咁即係話43年後就變天？
野村好認真咁列咗六個論點。佢哋話，內地經濟基礎同上層結構（政治制度）之間好有矛盾。而中國嘅政治改革，就係從共產黨改革開始，好似江澤民主席提出嘅《三個代表理論》。報告又乘機唱好日本，話中國可以參考日本戰後55年由一黨獨裁轉向一黨優位制發展嘅政治體制，以及參考台灣同韓國喺80年代後嘅民主化。野村又話，期待文革後一代領導人登上政治舞台，以和平演變為最終階段，仲解釋埋係「不使用武力而達到顛覆共產黨政權目的」。
關志雄79年喺香港中文大學畢業，之後負笈日本，取得東京大學經濟學博士，係中日關係專家。佢舊年曾提出，中國同日本嘅經濟結構係互補關係，而唔係競爭，而經貿合作嘅深化，可改善目前中日「政冷經熱」狀況。
[email protected]