董特首講回歸十年嘅感受，提到二○○二年八月曾經提過港元與美元脫鈎（六月七日），跟住梁錦松於六月八日回覆彭博問題與在六月九日在港台訪問證實當時曾經考慮過脫鈎建議，金管局總裁任志剛於六月八日答覆記者，證實董特首之言。
六月十日曾特首在湖南對記者講：「香港有充份資源和能力去維護聯繫滙率，這個做法我們不會改變，亦沒計劃改變。」事情到此告一段落嘞啩？點知現任財爺唐英年於六月十五日正式去信叫梁錦松唔好再講聯繫滙率，故此梁錦松對記者講：「官府已經叫我唔好講嘢。」之後逢有記者問及，佢就話冇嘢好講。
佢唔講，我哋市民就完全不知情，可謂冇知情權，令人遺憾。左丁山以為泛民主派議員會向官府抗議禁制梁錦松嘅言論自由㖭。點不知，吳靄儀唔知想咗去邊，居然話梁錦松洩密，要在立法會提出質詢，要求政府交代是否有意查究，以及政府對前任官員「違反保密原則」所採取的措施。
真想唔到香港點解會有一個咁糊塗嘅議員，佢哋經常批評政府黑箱作業，到事過境遷，董特首梁錦松係咁意講吓聯繫滙率啫，吳靄儀又鬧人洩密。點解佢唔順住個勢，要求政府披露更多二○○二年八月政府關於呢方面嘅討論呢？
人哋英美政府人員，脫離政壇不久就寫回憶錄，為歷史留下一啲紀錄。偏偏中國政壇唔興呢套，往往將秘密帶落地府，於國家，於後世，皆無貢獻。老實講，左丁山好希望董特首與曾特首能夠寫回憶錄，為回歸前後歷史作證，包括政制討論、聯繫滙率等在內。甚麼吳靄儀幫助官府封鎖秘密，希望董先生、曾先生以及立法會都唔好理佢。至於唐英年禁止梁錦松講聯繫滙率，太過霸道嘞，你第二日唔想寫回憶錄，都唔好阻止他人講嘢吖。即使聯繫滙率今天廢除了，也沒有大不了，梁錦松絕對有權提出再討論聯繫滙率的存廢！
《蘋果》班年輕經濟學家經常對經濟議題左批右批，呢次你哋批梁還是批吳呢？