《神奇四俠2》啱啱上畫，廣告谷到盡，個個等睇索女謝茜嘉同特技。小記對電影上晒腦，連架新到超長凌志都幻想佢係四俠上身！鬼咩，好端端一架富豪級凌志LS430，竟然將佢運過外國改造，夾硬由兩排位掹長到三排位，好難唔聯想起橡皮人神奇先生，仲有火氣猛、剛性夠、隱密對話等特色，的確好Fantastic！
記者：梁美甜
攝影：陳偉強
模特兒：Tiffany（TheGroup）
Mr.Fantastic神奇先生
手長腳長 都坐得舒服！
呢架LexusLS430特長Limousine，將原來短陣版LS430專程送到外國改造；劏開車身、喺中間駁長兩呎，簡直好似將佢拉長咗咁！見過實物又幾順眼喎，遠望足足有半架旅遊巴咁長，未坐上去已感受到佢嘅豪氣，諗都諗到佢座位肯定寬敞到暈。
加長成Limousine嘅新版LS430，裝咗一排豪華真皮座椅，除前面司機位外，後方兩排座椅為面對面設計，幾個人坐埋一齊大可自成一國談天說地。由於座椅有發熱功能，可以話冬暖夏涼，最盞鬼係四張座椅全部有按摩功能，最啱做完嘢、開完會趕下場嘅大忙人，可以偷閒鬆弛一番；人少少仲可以伸埋對腳過對面，連腳都做埋Massage，正到暈！
TheJnvisibleWoman隱形女
「隱」聲玻璃最啱 談心傾生意！
新版Limousine喺前後座之間，加裝咗塊透明隔音玻璃，好似隱形女俠化身咁，唔講都唔覺有塊玻璃喺度，唔似其他車用茶色咁玻璃，令後座乘客有太大侷促感，就算要跟Honey談心，又或有大生意密斟，都唔怕「隔牆有耳」嘛！
記者出咗名乃大聲公一名，坐喺後座實地測試過，關咗塊隔音玻璃後，再深呼吸大嗌，坐喺前座嘅Tiffany都依然聽唔到，證明隔音效果一流。反轉嚟想，一個人攤喺度，大大聲「轟」交響樂，唔怕影響司機、又唔似MK車咁嘈到人，都幾爽㗎喎！
TheThing石頭人
鋼水有我咁硬淨 夠晒保護
除咗豪氣度，相信車主第二樣關心嘅，就係有冇安全感喇。而凌志一向都係㗎仔威盡全球嘅豪華級房車，鋼水硬淨度當然有番咁上下，石頭人撞埋嚟都無有怕！車身渾圓得嚟亦富有時代感，一望就覺得佢夠晒堅，將LS430加長兩呎成Limousine版本，依然保有歐洲豪華轎車風範，講真，如果佢加埋防彈玻璃嘅話，相信喺香港舉行國際會議時，用嚟載各國首相等大人物都仲得！
HumanTorch霹靂火
4,300c.c.V8引擎 好火氣
雖然部車加長咗重身咗，外形豪咗升格咗，但佢嘅馬力依然強勁，事關沿用4.3公升V8引擎，起跑加速都勁力十足！部車就反應好到暈，速度好似霹靂火，搞到我坐上司機位時遲疑到死，因為佢反應實在非常好，好驚一踩油就飆！事實亦證明佢真係好踩得，完全無半點遲滯性！最令我欣賞嘅係嗰套6前速半自動波箱，轉檔反應順滑自然，搞到我好似揸車技術進步咗咁！另外仲有Power同Snow模式選擇，加埋一套可以調校軟硬及高低的電子懸掛，令行走唔到路面時，車子都平穩而順暢，當然佢嘅主動式電子TRC系統對穩定性亦係功不可沒啦！
記者感受：夠豪華但唔夠細心
後座加多咗一排真皮對座，仲要四張都係按摩椅，巴閉到暈，不過我就嫌冷氣唔夠，因為中、後座只得兩個出風口，太陽曬住未必頂得順！後座嘅DVD只可以俾兩個人睇，事關佢裝咗喺中排座椅之間，坐中間嘅乘客就睇唔到喇！都係嗰四張按摩椅最實用，知心朋友又或一家人，攤晒喺度按摩，再播埋柔和Music，感覺真係爽！
LexusLS430特長Limousine
引擎：4,293c.c.V8DOHC
馬力：282ps/5,600rpm
扭力：42.5kgm/3,500rpm
傳動：6前速半自動波，後輪驅動
車價：售價待定
查詢：富利堡汽車28776700