今時今日要教小朋友有規有矩，除咗靠父母傳授外，仲可以參加禮儀班。經過連日搜羅，港威酒店每月舉行嘅培訓班係最超值，有莫Auntie坐鎮，小朋友實變得更有儀態啦！
記者：黃錫蓮
攝影：楊錦文、陳盛臣
模特兒：言振凱、Suki、VenusTong
基本禮儀你要記
．進食時要用恰當餐具，只有BB才可用手食。
．不要把嘴巴塞滿食物，因為好不雅，而且容易哽親。
．咀嚼時要合上嘴巴，不要發出聲響和說話。
．如果唔係自助餐形式，必須等待每位人客齊菜後才開始品嚐。
．吃自助餐時切忌把碟叠高。
．將食物切成小塊狀再放入口。
．切勿伸手跨越其他人客面前拿取任何食物或用具，應請其他人幫忙傳遞。
．飲水時要拿杯的底部。
．食意粉時，用匙來托住一小撮意粉，用叉捲起嚟食。
超值港威酒店莫Auntie做導師
剛進場，公關就帶記者同兩位導師打招呼，其中一位原來係莫何敏儀（莫文蔚媽媽）。莫Auntie出名舉止優雅，連今屆港姐都要向佢請教儀態。另一位導師係港威酒店的助理餐飲經理SimonLee，有多年從事餐飲經驗，當然精通餐桌禮儀啦！有兩位猛人做導師，絕對靠得住！
成個課程以生動形式教授唔同場合嘅談吐、舉止及禮儀規格。上完堂，每位小朋友可獲得由港威酒店頒發嘅證書一張及教材，收費係作慈善用途，幫助貧窮的小童及有需要人士，非常有意義。
Model仔話易學
今次帶來6歲嘅小Model言振凱來上堂，莫Auntie及SimonLee教佢入座時要幫女士拉凳，佢又真係做得有板有眼，而佢亦話：「其實都幾易學，不過要成日記住！」
地點：尖沙嘴海港城港威酒店3樓綾綢宮
日期：每月公佈
收費︰每位小朋友及一位家長$368（小童年齡由6至12歲）
查詢：21187223
記者評語
呢個課程最抵之處係只需$368，小朋友和家長都有得學有得食，上完堂仲有證書同教材送，非常着數，怪唔之得堂堂座無虛席，要報名真係要快啲。
學完食埋TeaBuffet
課程導師係麗嘉酒店宴會總監Kenneth，佢年年暑假都會開班教小朋友禮儀，所以好有教學經驗，「上堂時，我會先講解課程目的和內容，然後開始分派湯、主菜和甜品，俾佢哋有實戰經驗。上完堂後，佢哋可以同父母會合，享用我哋酒店嘅TeaBuffet。」
地點：中環干諾道中3號香港麗嘉酒店
日期：7/7、28/7、11/8
時間： 1pm-3pm（禮儀班）
3pm-5pm（TeaBuffet）
收費︰$928（29/6前繳付全費可獲九折）
查詢：28776666
記者評語
上完堂後，可獲由英國名師設計的兒童餐具，價值成$400！而且可以同父母歎TeaBuffet都算幾抵。可惜理論時間較實戰多，小朋友未必有心機上，好似今次帶去的小ModelSuki咁，又喊又坐唔定，要佢留心上堂，就真係麻煩了！
教授日常應有禮貌
呢個課程同之前兩個最唔同嘅地方，係較日常生活化。課程策劃主任EvaLeung會教小朋友日常生活嘅禮貌、主人客人的餐桌禮儀、日常應對時應有的禮貌，仲有遊戲互動。唔單止教西式餐桌禮儀，還會教一些生活上應有的禮貌，如送禮時要用雙手、站立和坐姿要端正、入房要敲門、離開要和主人家道別等，這些看似微不足道，其實現今有很多小朋友就是沒有這些應有的禮貌。
地點：九龍塘聯合道320號建新中心G25&G27
日期：9/7-3/8、6/8-31/8
時間：星期二、三、五不同時段
收費︰$1,200/8堂
查詢：23389516
記者評語
課程最好嘅地方係夠生活化，小朋友可即學即用。唔好嘅地方係內容太簡單，所以只適合年紀較小的小朋友，而且有8堂咁多，小朋友未必有耐性上齊，如果當係暑期興趣班咁上，都係唔錯嘅選擇嘅。