陳法拉、陳鍵鋒和胡定欣昨日到朗豪坊，擔任肌膚治療中心開幕儀式的嘉賓，不過眾人風頭卻被同場的混血模特兒MandyLieu蓋過，皆因她的男友、台灣男星陳柏霖專誠來港捧女友場，兩人煙韌甜蜜蜜，簡直恨死隔籬。
擔任肌膚治療中心代言人的混血模特兒MandyLieu，昨日與陳法拉、陳鍵鋒和胡定欣等一同出席新店開幕儀式。月初Mandy被拍得與男友陳柏霖把臂同遊台灣的照片，昨日活動開始前，記者就發現陳柏霖的蹤影，不過他卻即時走到房間避開記者的鏡頭。
對望密密斟
儀式開始後，一身白色低胸裝的Mandy獲厚待站在台上中間位置，不時與陳法拉有講有笑。直到活動完結，記者要求陳柏霖與女友合照，陳柏霖現身時顯得十分尷尬，被問到是否特地來港捧女友場時，他說：「係呀係呀！」連女友招手叫他合照都懵然不知。
一對小情人合照時手拖手，又不時情深對望和密密斟，非常煙韌，簡直羨煞旁人。事後Mandy接受訪問時，以標準的廣東話說：「我哋拍拖唔係好耐，係之前做嘢時識嘅，不過佢好錫我，我哋一齊好開心。」
《學警》好帶挈
至於同場出現的陳鍵鋒則以西裝煲呔示人，他說：「大會叫我着得整齊啲，襯番啲女仔嘛。其實都係多得《學警出更》啦，呢排多咗好多嘢做，收入應該會多咗6位數。」
採訪、攝影：藍文浩
