時間：03年11月19日
地點：將軍澳電視廣播城
人物：張可頤、佘詩曼、郭可盈
經過：風水輪流轉，無綫每年台慶都會搞頒獎禮，鼓勵全年拍劇有最好表現嘅男女藝人。3年幾前，張可頤就憑劇集《九五至尊》中呂四娘一角擊敗同年勁敵宣萱、郭可盈同佘詩曼，攞咗我最喜愛的女主角。張可頤一直都深信自己攞硬獎，所以上台領獎時話：「唔好cut我機，我仲有好多嘢要講，呢個獎我恨咗好耐。」
原來張可頤當日台慶冇去到做綵排，偏偏監製冇鬧佢，反而狂抦阿佘，當住其他藝人鬧佢：「嗰個佘詩曼係咪想唔撈㗎？」張可頤攞到獎又好囂，周圍點火頭，當晚台慶夜阿佘講嘢時，張可頤被影到嘴藐藐，跟住又話郭可盈冇代表作，郭可盈事後勁寸咁話：「可能佢（張可頤）攞獎經驗少，其實有冇代表作唔係由佢講。（攞獎）好似打麻雀，實有輸贏，如果牌品差，以後就冇人肯同佢玩。」
當張可頤攞獎後再跟呢幾個女藝人同場，不和越嚟越明顯，阿佘唔肯坐埋佢身邊，對於成眾矢之的，張可頤話：「我以後講嘢會好小心。」
不過前排張可頤患病，消失咗一段時間，但經過兩年休息，佢近日運動操練自己，希望以最佳狀態早日復出拍劇，不過當年俾佢壓倒嘅阿佘，今日已超前坐正做首席無綫花旦。
本欄逢周一至周六刊出