華懋集團主席龔如心（小甜甜）逝世之後，千億元遺產花落誰家睇怕有排至有定案，但係外間一直流傳呂良偉會分到小甜甜嘅身家，不過阿呂一早否認咗。
估唔到噚日內地網易娛樂又有報道，指有記者曾經見過阿呂銀包入面攝咗張小甜甜嘅相片。事緣日前有內地記者到《八月一日》嘅電影拍攝現場探班，突然阿呂攞咗銀包出嚟，竟然有一張小甜甜嘅相攝咗喺度，不過阿呂助手見到有記者睇到，立刻將相片抽走咗。
考慮法律追究
噚日馮仁昭打畀阿呂，佢一聽就話：「無稽、亂噏！冇咁嘅事，我銀包無端點解會擺佢張相喺度？呢啲咁嘅報道，我真係要考慮追究法律責任，我一早講咗同小甜甜冇關係，點解係都要造呢啲咁嘅消息出嚟？𠵱家我喺內地拍緊戲，真係唔想理咁多無聊新聞。」