周汶錡（Kathy）上月生日時，透露會同佢嘅法籍男友JulienLepeu以及一班朋友去美國旅行，雖然否認男友同佢求婚，但見佢大方承認戀情，睇嚟兩人關係都幾穩定。
Edison吹水過節
前晚端午佳節10點幾，又見Kathy同法籍男友喺蘭桂坊拍拖，同行仲有三個男女友人，見佢哋啱啱食完飯，行去鏞記方向準備搭車，其間法籍男友不時輕撫佢嘅秀髮，幾咁煙韌。不過當Kathy見到記者影相時，即刻同男友分開行，男友想拖佢，佢點都唔畀男友拖，行到去鏞記門口，佢哋同班朋友道別後，就跳上的士離開。
另一邊廂，前晚大約11點幾，見到穿上背心、短褲、踢住人字拖嘅陳冠希（Edison），一身街坊裝咁喺雲咸街過馬路，同行仲有兩個男性朋友，見Edison面紅紅，應該係啱啱飲完酒，可能女友Vincy唔喺香港，令到身為CEO嘅陳冠希，搵咗兩個朋友陪佢吹水過節。
