即將加盟洛杉磯銀河嘅碧咸（DavidBeckham），啱啱協助球會皇家馬德里重奪西甲冠軍，為佢喺西班牙嘅事業畫上完美句號。無巧不成話，碧咸喺荷李活電影《一球成名2》（Goal!2：LivingtheDream）入面，同樣為皇馬喺歐冠決賽中取得致勝入球，風頭幾乎蓋過主角梅里斯（SantiagoMunez）。
足球三部曲第二集《一球成名2》今年9月喺美國上映，香港會同期推出影碟。碧咸今集雖然只係配角，但戲份極重，佢嘅大特寫同赤裸上身嘅鏡頭經常出現，致勝入球又係由佢包辦，連電影海報都有佢份，成套戲好似為佢而設咁。
認阿媽添煩惱
今集講由古洛碧加（KunoBecker）飾演嘅主角梅里斯，從紐卡素轉投西甲勁旅皇家馬德里，同碧咸、施丹（ZinedineZidane）、朗拿度（Ronaldo）同羅賓奴（Robinho）呢班頂級球星並肩作戰。不過佢起初只係同隊好友Gavin嘅後備，好在佢慢慢融入球隊，又不時有入球，開始得到教練重用，名利雙收之後買車又買樓，享受燈紅酒綠嘅生活，仲有靚女送上門㖭。
喺呢個時候，梅里斯偶遇失散嘅細佬，知道親生阿媽喺西班牙，自此人生起咗重大變化，先後面臨坐冷板凳、練習受傷、同經理人決裂、打傷攝影師被捕、同未婚妻誤會，問題多多，可謂人生低潮，不過佢經過咁多挫折後，悟到親情可貴，認番阿媽同細佬，仲向未婚妻道歉。
尾場球賽緊張
但講到全片高潮位，一定係歐冠決賽皇馬大戰英超球隊阿仙奴，有亨利（ThierryHenry）同龍格保（FredrikLjungberg）坐鎮嘅阿仙奴領先兩球，之後梅里斯拍住Gavin攻破敵陣，拉近戰況，補時階段嗰陣，梅里斯再怒射破網，為球隊扳平。到球賽完結一刻，梅里斯喺禁區外被侵犯，再次擔任「救世主」嘅碧咸以一記招牌式罰球奠定勝局，為皇馬奪得錦標，全片亦喺球迷嘅歡呼聲中結束。
撰文：戶川淳
球星滙聚夠專業
今集唔少篇幅描寫主角喺皇馬嘅賽事，客串嘅球星同出鏡率都比上一集多，除咗皇馬嘅施丹、朗拿度外，仲有阿仙奴嘅亨利，真係星光熠熠。
值得一提嘅係，早前訪港嘅英國球星麥馬拿文（SteveMcManaman）佔戲幾重，扮演助教嘅佢，原來有份負責監製呢齣戲，據知佢負責向導演提供資料同專業意見，譬如皇馬嘅更衣室佈置，球員嘅小動作等等。