關心妍（Jade）將於下月推出新碟，被指重奪BMA一姐地位的Jade，提到與她屢傳不和的周麗淇（Niki）時，坦承兩人性格不夾，不能成為交心友。
關心妍不知不覺已入行五年，一出道被封為實力新人王，更被視為BMA的一姐，不過自從兩年前公司簽了周麗淇之後，Jade就如被打入冷宮一樣，兩人不和的報道甚囂塵上，Jade一姐地位危危乎。不過Niki因早前被傳只顧拍拖而被公司雪藏，令Jade得以重奪一姐的地位。
曾迷失方向
日前Jade到尖沙嘴接受訪問，她透露將於下月推出新碟《Lost&Found》，在現實生活中她亦曾經試過有迷失的經歷，她說：「喺前一、兩年時，自己因為合約問題而迷失，當時都唔知仲可唔可以喺娛樂圈，覺得自己唔得，加上啲新聞層出不窮，唔識應付，亦都唔識點包裝講說話，曾經真係諗過放棄，但後來我發覺音樂係可以療傷，自己始終最鍾意唱歌，最後終於都能走出迷失。」
至於與Niki的不和傳聞，Jade坦言傳聞令她不勝其煩，但說到誰是公司一姐時，Jade就打趣說：「就嚟出街唔使帶遮，可能我早入呢間公司，所以大家先覺得我係一姐，其實要數一姐就梗係老闆娘啦，不過如果要分唱片同電影部嘅一姐，我同Niki都可以一人一邊，我諗佢都唔介意，因為我真係冇拍過戲嘛，總之大家都係想做好呢間公司啫。」
交心講緣份
不過講到和Niki能不能成為交心友時，Jade毫不考慮說：「唔會交心，交心唔係識一、兩年就得，始終性格唔夾，一個動一個靜，而且亦都冇共同興趣，雖然大家係朋友，交唔交到心都要講緣份，我就唔會因為新聞而刻意交心，總之順其自然啦。」
採訪：駱華齡 攝影：林德雄
髮型：AbbyofHair 化妝：Karmen
服裝提供：Max&Co 場地提供：KingLudwigBeerhall
