《上海灘》一幕亂槍掃射出街後，發哥一炮而紅，但觀眾唔多唔少都覺得係「做戲咁做」；不過，紐卡素前鋒馬田斯就喺現實世界中，俾恐怖分子連槍狙擊，幾乎重演了這一幕經典！
大難不死老友當災
馬田斯首季登陸英超，射入11個聯賽入球，頓成紐卡素英雄；但當佢返回出生地，尼日利亞首都拉各斯時，就無啦啦由英雄降格成為追殺目標！事發喺18號晚上，馬田斯駕車經過油站時，突然有3名蒙面恐怖分子，以烈火戰車嘅速度移近，並接連狂開數槍掃射，打中部車嘅車頭擋風玻璃，幸而主角冇學足發哥場戲，最終大難不死，執番條命！
當時，馬田斯雖然嚇到騰晒雞，但都識得即時倒車避開狙擊，並伺機逃走，可憐佢朋友就手部、膊頭中槍，成為代罪羔羊！馬田斯事後已飛往意大利，避免再遇一劫，佢受訪回憶起事件仍猶有餘悸：「我好驚呀，仲以為死硬，一切情景都好似拍緊槍戰戲咁！」
自問同人無仇無怨嘅馬田斯，諗極都唔明點解會俾人追殺：「如果有賊人揸槍打劫，我最多畀晒啲錢佢，但佢哋又唔似係要錢，只係一心一意想攞我命。」佢一路講，一路標晒冷汗：「我阿媽見到部佈滿子彈窿嘅車時，驚到差啲暈低，並重複問『究竟邊個想你死啫？』，我都唔知點答佢。」
疑缺席國際賽所致
估計馬田斯被襲原因，可能係報復佢缺席該國近幾場國際賽所致，如果係就真係幾恐怖。經歷九死一生浩劫後，馬田斯自言唔排除從此退出國家隊云云……求大俠自問睇戲唔少，如果呢次同佢唔踢國際賽冇關，咁就可能係槍戰片中，編劇成日都鍾意用嗰條橋──點錯相！