搞電訊嘅e-Kong噚日出咗張通告，係關於佢哋副主席兼董事總經理KuldeepSaran，佢響本月16號不幸辭世。
SUNDAY搞手之一辭世
印度籍嘅Kuldeep何許人也？此君從未公開在記招露面，儘管極度低調，但查實乃係香港幾個殿堂級電訊教父之一！
曾經同佢共事嘅靚仔線人話，Kuldeep出身摩托羅拉，之後埋咗衛斯文嗰堆，一齊幫超人開山劈石搞和記電訊。之後由於同超人意見不合，於是夾手夾腳同衛斯文另起爐灶搞SUNDAY。
後來，SUNDAY賣得成畀李二少澤楷，此君有份做中間人，功不可沒也！
線人又話，如果冇計錯數，呢位超級好好先生今年大概只係55歲左右，4月嗰陣佢仲同衛斯文齊齊增持e-Kong，突然間就咁去咗，真係電訊界嘅損失！