港股大升浪，一發難收，噚日恒指一度急升近300點，衝到21900點水平，急升後回吐，好正常，尾市升幅收窄，恒指仍升101點。國指則衝上最高12138，大升272點，後回收11905，僅升38點，但同恒指都齊齊創出新高。成交暢旺，衝破1000億元大關後，又再進一步，創出1214億元嘅新紀錄。
大市成交比上半月每日平均成交幾乎倍升，資金傾盆入市，大藍籌和國企會繼續成為追捧對象，估計大市升勢會再持續多兩個禮拜到一個月，恒指上升目標指向23000點。
國企領導股已做咗火車頭，落後股亦已接力而上，噚日推介嘅華電國際（1071），一發力就衝上4.26元，回收4.13元，仍升0.21元，升幅5.3%，成交更大增到5500萬股，短線仍以5月中高位4.72元為目標。
今日推介另一隻國企大落後股上海電氣（2727），噚日已發力，高收3.47元，升0.22元，升幅6.7%，但同今年2月初嘅高價4.26元比較，仲低咗18.5%，追落後，諗得過。
成交激增動力充沛
上電噚日成交大增，有1.48億股，比本周一的5000萬股大增近兩倍，動力明顯轉強，且係裂口高開高收，一舉而升破3條平均線同兩個月嘅下降軌阻力，短線可博升上4月中的高位4.08元。
集團以生產電力設備及相關服務為主，06年（12月結）營業額426億元，升24%，獲利20.48萬元，升22.5%，每股盈利17.23仙，升13.5%，派息6.1仙，升48.8%，派息比率由29.1%升至35.4%。
內地「十一．五」重點投資11000億元作電網建設，上電未來幾年的盈利，預期會有穩定增長，而上電亦有注資同重組概念，繼今年初以1.52億元向母公司收購上海起重97.24%股權後，又出售上電租賃95%及上電保險50%股權，套現2.03億元，公司將把出售所得資金用於核心業務的進一步發展，加強集團在中國大型裝備製造業的競爭優勢。