內地報道，中國銀監會查緊八間銀行分行違規企業借貸，其中5間話會罰50萬人仔，當中包括工商銀行（1398）同埋中國銀行（3988）等香港上市嘅大陸銀行。喺《香港討論區》嘅網友就一啲都唔擔心，認為罰嗰少少錢，對於六行嚟講實在太濕碎，點會對佢哋嘅股價有影響，嚟緊會係咁爆升。
投機小子好醒咁話：「仲以為阿爺用藤條打仔，點知用報紙嚟打，咁點會痛啫，嚟緊六行仲會升！」另一網友要做好投資管理更話：「罰嗰50萬，人哋肖鋼食餐飯玩兩手都唔止咁嘅數目喇！一間銀行賺咁多十億，點會計較咁細筆數，緊張嗰少少錢，係唔會發達嘅！」
網友kenchu86亦繼續睇好內地銀行股，「六行一發威，就係龍咁威！」Revive就睇好工行，認為係首選，而建行（939）就可以博佢返去內地上市，再炒多鑊。Coco67更話：「話晒香港回歸十周年噃！點都要做吓戲，畀散戶賺多次錢嘅！」
網友Kiss始終有啲擔心：「呢個可能只係開頭，即係話畀人聽，阿爺嚟緊會做嘢，睇嚟各大銀行嘅貸款都會收斂，對銀行嘅收入點都會有影響！」而Numan123亦好同意咁講：「問題唔係罰幾多，而係呢啲違規行為，可能只係冰山一角，將來會慢慢影響成間銀行。」
http://www11.discuss.com.hk/viewthread.php?tid=4514414&highlight=%BB%C8%BA%CA
報料站
歡迎提供網上財經趣聞，資料一經採用，酬100元。
請附姓名、電話及電郵地址，交[email protected]