港股喺端午節前勁飆五百幾點，網友天才波喺《香港討論區》話：「個市升得咁勁，係為咗慶祝香港回歸十周年。」IceHeart亦同意呢個睇法：「大戶用回歸嘅藉口炒作港股。」Rayliberte話：「恒指應該會上到21888嘅好意頭，嚟慶賀回歸㖭！」
中移動（941）係升市火車頭，股價勁升6%，突破80蚊。網友tfanman好興奮：「隻941簡值變咗430穿梭機，一飛沖天！」另一網友蠢散更話：「唔見紅底不罷休！」本來一片昇平慶回歸，但偏偏有口癢友就反高潮：「雖然係咁勁！不過家吓啲穿梭機好易空中爆炸噃！」
除咗中移動，網友Blowatermanlau話：「有個『中』字嘅股票都威晒！」鄙人亦指：「揸重『重磅股』，真係發過豬頭，尤其識揀貨，好似揸重建行（939）、招行（3968）同神華（1088）股票嘅『爸打』就梗係發！」
網友Sslhk就靠買咗工行同建行兩隻中資金融股認購輪，執咗8000蚊。Hcvincent話：「出咗『雙糧』，賺兩皮嘢吖！」但喺升市嘅時候，總有啲人睇淡，Mookpk就擔心：「當有異象出現時，世界末日就會降臨㗎喇！」又嚟一個反高潮。
http://www11.discuss.com.hk/viewthread.php?tid=4508539&highlight=%2Btfanman