來自SantaMonica嘅經濟師Ｗ，要搵左丁山問一問香港有邊啲猛人對中國投資有認識，而且又能夠以英語向美國賓架演講嘅人士，佢話曾經請過一位到LA演講，但呢位先生一味照本宣讀，唔夠膽用英語答問，同台上其他美國講者無法融合，場面都幾尷尬喎。
因大家要互相遷就時間，卒之約咗經濟Ｗ去陸羽飲茶，等佢下午可以趕去深圳。經濟Ｗ話住響蘭桂坊酒店，以為話咁快就到史丹利街陸羽，點知呢間酒店原來位於上環街市嗰邊，搵的士好難，經濟Ｗ好彩記得在港讀培正中學之時，跟過父親到陸羽，依稀記得地址，行吓行吓，卒之搵到。經濟師Ｗ話：「我上網搵到間酒店，話位於CentralBusinessDistrict，仲以為佢喺中環㖭！」外國城市嘅CBD，即係指商業中心區，經濟師Ｗ在香港長大，見到Central，就以為係中環，於是誤會晒。
經濟師Ｗ自從到美國讀大學，一去不回，成為美國人，此大概係培正中學風氣，經濟Ｗ話在紐約地區，由廿幾歲到八十歲嘅培正校友，有八百幾人，培正在美國有唔少科學家、工程師，所以經濟師Ｗ講：「諗起嚟，母語教學其實效果唔錯。𠵱家香港大學理學院院長郭教授都係我培正師兄啫。」如果咁講，港大校長徐立之係巴富街官立中學校友（現稱何文田官中），一樣係母語教學產品。不過左丁山提醒經濟師Ｗ，當年中文中學嘅課程與英中唔同，數理科程度零舍高過英中一啲，故此培正中學畢業生到美國讀理工科，成績驕人，但現在英中與中中嘅課程劃一，中中學生啲英文程度稍弱，留學外國就比較吃虧，讀第一年辛苦好多。
點解要搵香港人到美國演講呢？經濟師Ｗ話中國興起，印度上升，美國賓架與投資者不敢忽視，故此現在佢哋每年召開大會，都要想辦法搵亞洲講者。題目由法治制度、教育、人才培訓，以及投資風險到經濟分析等。佢遲吓會諗一個Chindia論壇，集中討論中國與印度，叫左丁山不妨介紹啲叻人畀佢。