港股大時代，恒指同國指都大升幾百點，齊齊創出新高，總成交亦以雷霆萬鈞之勢，衝破1000億元大關，大市經歷過一段股仔百花齊放、幾年難得一見的美好時光後，又輪到大藍籌同大國企發力。
瑞午節扒龍舟，「扒得快、好世界」；但呢兩日，揸住股仔嘅，就「沽得快、好世界」，唔少股仔假前嘅低位同早幾日嘅高位比較，閒閒哋都跌成3至5成。
股仔急跌，理由好簡單，只有兩個，一個係炒過龍，升幅以倍咁計，調整係遲早，甚至跌幾成亦絕對正常；第二係窩輪「翻生」，呢兩日成交突然飆升到150億元，熱錢紛紛轉移陣地，股仔因而被「掟散」。
不過，股仔大升浪，幾年唔逢一閏，唔會咁快玩完，家吓仲係如日當空，距日落黃昏，仲有好長時間，要演身手，賺大錢，可繼續在股仔身上打主意。就以假前股仔跌潮為例，好多急跌後，即時由低位反彈兩至三成，且仲有倒升嘅。
華電快有注資
●國企急升，同中港傾緊設立一個套戥機制，拉近AH股差價有關，而H股亦會進入另一個炒作階段，折讓越大嘅，越有憧憬，就算A股價大回，H股小升，升幅都會好可觀。
3大電力股中，大唐發電（991）同華電國際（1071）同A股相比，折讓都超過6成，大唐連日急升，股價迭創新高，反而華電收3.92元，低過5月中的4.72元好多，落後大市好遠。
華電將會有大型注資，安排向母公司收購5000兆瓦的電力資產，涉資約150億元，令裝機容量上升27%至2.5萬兆瓦，華電將會增發A股集資，預期下半年華電股價會受注資消息刺激，升破4.72元，再創今年新高。
●股仔跌得急，但有實力同前景嘅，彈得亦快，上周推介宏安（1222）（股價0.79元），最低0.7元，大把機會上車，跟住就大幅反彈上0.92元，走勢最勁。另一隻要留意嘅係和成國際（651），在股仔大跌市中表現強勢，仲創出2.01元高收，此股轉型消息好勁，下月初仲1拆10，擺明會大展拳腳，年中嘅明星股，可能有佢份，小炒博大堆，止蝕位1.8元。