禮拜一港股創咗兩個重要紀錄，就係新高指數同新高成交，個成交金額好令人振奮，係1000億，咁咪好多人賺錢？
咁又未必，睇吓啲股仔點跌法，大家可能有唔同嘅諗法。不過，如果集中炒「六行三保」啲C輪，當然係十分「肥仔」嘞。
恒指升咁多，中移動（941）上升有唔少貢獻。不過，真正帶起個市嘅都係六行三保，今時唔同往日，六行三保嘅影響力好大，唔單止喺恒指發揮影響力，對現貨同窩輪嘅成交都好緊要。過多幾個月每隻成份股佔恒指嘅比重最多係15巴仙，到時六行三保嘅影響力仲大。
新高成交之後會有新高指數，慶賀回歸10周年，恒指有機見22000，帶頭股份都會係六行三保，工行（1398）未破4.65元仲未可以做「龍頭」，暫時嘅焦點會喺國壽（2628）同平保（2318）上面，呢兩隻股嘅C輪會升得多啲。
國壽C輪9459：國壽前日報收26.95元，歷史高位28.85元，睇嚟好快可以破，破咗位短線睇32元，可以買啲C輪9459。隻輪禮拜一收35仙，槓桿7.7倍（有效5.6倍），正股升上28.85元同32元，9459應該喺50仙同76仙樓上，正股跌穿25.8元止蝕。