最鍾意去旅行，仲經常唔使錢搭飛機去台北、曼谷同上海，但我唔係識咗航空公司太子爺，而係用AsiaMiles（亞洲萬里通）換啫。不過，諗住要用里數換機票嘅朋友，遲啲換着數啲。
因為AsiaMiles會首次調整換機票換算表，大部份來往亞洲、歐洲國家航線嘅經濟客位，都會調低所需里數，例如曼谷機票由25,000里減到20,000里，去日本東京、北京同新加坡嘅，都由35,000里減到30,000里，用少啲里數去換，抵咗！
不過，佢哋話咁係要反映機票市場價格，長途航班頭等及商務客位來回機票，就調高里數。（算啦，嗰啲要十幾廿萬里，幾時先儲到。）新修訂適用今年10月15日起簽發嘅機票，詳情上網睇 http://www.asiamiles.com。
同事阿貴成日出差，但冇申請加入AsiaMiles，如果唔係儲埋嘅里數可以免費飛好多次日本啦！少數怕長計，我儲啲里數，係用信用卡積分、入油積分同埋食肆積分加埋嘅，唔使靠搭飛機㗎。
逢周一至周四刊出