網上熱播嘅真正回歸金曲《福佳始終有你》，上個月26號喺YouTube登場後一直人氣高企，到噚日已經有超過54萬hitrate，多過hardsell嘅官方版本接近七倍，坊間仲掀起一片「福佳熱」，勢不可擋。一曲成名咁風光，原班製作人馬趁回歸十周年贈「㷫」，連夜趕工整咗首《福佳》7.1版，最快今日擺上網。公民黨嘅毛孟靜提出7.1上街唱《福佳》，民陣嘅李卓人都話播歌noproblem。
負責監製兼剪片嘅Freeman同八方講，六四版嘅《福佳》由「人豬共憤」嘅馬力擔正，但7.1版就以政府𤓓爆事件為主，教院風波、小圈子選舉同嘥公帑睇風水都係重頭戲，由煲呔、飯焦、阿瑟王領銜主演。為咗要達到「抵死但唔涼薄」嘅境界，雖然早幾日已經剪好片，但出街前都要做非正式嘅試片會，然後將啲片段加加減減，所以搞到今日凌晨先有得去片。
齋聽聲，新版《福佳》依然係「粒粒巨星」，皆因得到網友熱烈支持，網版克勤、阿倫、劉華都出聲勁撐。林忌仲做埋混音技工，手握每把聲嘅生殺大權，可以決定邊個有得solo，邊個冇得出聲。
林忌接受訪問觸動情緒
靠《福佳》成為新一代「15分鐘英雄」嘅林忌一朝成名，身份神秘從來係見文唔見人，前排破例接受《壹週刊》訪問，雜誌見街後佢喺自己個blog度post咗段《閉門造車真興奮》嘅文，大罵壹仔記者吹水作嘢寫「故事」，振振有辭攻擊傳媒冇操守，一派受害人兼正義超人格，指出：自己冇試過同肥佬黎食飯，暗示《福佳》唔會有7.1版，就算有，都實牙實齒十分權威地反駁公民黨陳淑莊冇份唱，民主黨嘅林子健亦唔會出聲。
八方本住佢話新聞人「一落千丈」嘅求真精神，想問林忌發生乜事？但佢家下身處歐洲冇直接回應，八方惟有向相關人士埋手，結果陳淑莊親口證實真係有錄音，林子健亦係。不過據超級知情人事講，有人不滿壹仔篇訪問提及「發神經」三個字，所以有啲情緒波動，於是將陳淑莊同林子健嘅獨唱部份kill咗，改為mix喺大合唱嘅副歌度。但黎老闆就真係冇同林忌吔過飯。
過咗幾日，林忌喺自己個blog又彈弓口話《福佳》真係有「第二版」，但就企硬唔用「7.1版」字眼喎，呢鋪真係唔知邊個發神經咯。
精采片段
《福佳》7.1版（節錄）
乜都改改彷彿易事
制度轉千次
成全李憤長與飯焦
分心打機都好沉迷
創造了英語
羅羅李李
合併超勁！
唐突籮柚谷爆好句
高雅嘅樂趣
失禮香江醉精
無聊場合大小也力拼
是誰陪伴馬力
望下屆高升？
煲呔搵工靠你！
（IwillgetthejobDone！）