香港人貪新忘舊，成日掛住趕潮流，令到唔少舊時好威水嘅行業或物品光輝不再，例如黃金年代全城都識嘅生力啤，𠵱家好似變咗集體回憶咁，佢哋唔係最近出個聲明，華華都忘記咗佢嘅存在。
生力啤個聲明話，通過改組香港嘅酒廠生產，改善集團嘅長期盈利。咁即係點？咪喺今年9月底停咗元朗酒廠條啤酒生產線囉，等集團嘅其他酒廠可以盡量發揮產能。
生力啤呢個酒廠係香港唯一釀製啤酒嘅廠房，以後香港人飲嘅啤酒都要入口。生力啤當年其中一個宣傳口號－－新鮮，將成歷史嘞。
懷念深井廠房股東會
生力啤元朗酒廠停產，即時觸動華華嘅神經線，以為佢哋會賣廠房套現，但實情係進一步制訂改組計劃，包括元朗酒廠及其相關資產嘅替代安排，好似生產不含酒精飲品或烈酒等。
華華查過資料，原來生力啤呢個廠房，喺元朗工業邨入面，睇怕唔能夠改用途起住宅賣，當工業地又唔慌賣到好價錢，即係話冇法重演當年賣深井啤酒廠賺大錢嘅神話，唔怪得佢哋冇賣廠嘅意思啦。
講番生力啤嘅深井廠房，其實係唔少忠實股東好懷念嘅地方，因為舊時生力啤股東會就喺呢度舉行，地點雖然隔涉，但公司唔係想班股東「知難而退」，而係要喺酒廠搞股東會，係與小股東同樂嘅大食會，嘢食豐富、有新鮮啤酒飲，仲可以睇埋廠，一舉數得，係咪好有心思呢？
嗰個廠址喺94年以35億賣咗比會德豐，變咗做𠵱家嘅碧堤半島，股東之後都冇乜機會出席咁有特色嘅股東會，但當時就收到四個半現金紅利補數。不過，會德豐就冇咁好彩，喺發展期間因補地價拖延，同遇上樓市大跌，搞到要兩度撥備，初期開賣價又低過成本價，認真慘情，至近年樓市回升，先至可以收番失地。
[email protected]