夏天做咩好？仲使諗梗係玩水，拖男帶女玩餐飽快活過神仙。大家有冇同感，梗有人負責影相就住唔敢落水，人哋開心死、自己冇癮死。一係成千蚊買個防水殼冇有怕，但年中用得幾次，係咪物有所值？如果有部纖巧潛水DV，拍片兼影埋相，係咪Perfect先？三洋剛出咗部XactiCA65，1.5m防水、600萬像素鏡頭，遊船河落水玩，大派用場喇！
記者︰陸俊雄、陳國輝
攝影：譚盈傑、陳偉強
三洋新機發佈搵嚟JJ做出水俏芙蓉已經夠嬌俏，實際啲嘅，仲搵嚟一大班跳韻律泳女生，拍低整個教水過程，真係做到實際試用，果然有橋。不過大家喺公眾泳池就咪亂試，人家寫明不准拍攝㗎！
1.5m一般玩家至實際
Olympus早就出咗10m潛水770SW，三洋新機算得啲咩？冇錯1.5m潛得唔算深，不過同真正潛水攝影專家傾過，普遍用大機加防水殼，又點會拎部DC仔潛水。
所以坊間嘅潛水相機，最多應用喺浮潛上，1.5m變相足夠。而三洋優勝在唔只係一部可拍短片DC，而係一部可影600萬像素相片的DV。淨講2.5"LCD可作290度旋轉已經無得比。其次最高支援8GBSD卡，比起Olympus用完全唔Common嘅xD卡就更方便。而且CA65可以喺水中攝錄時，隨時拉近ZoomOut，好多潛水機都冇咁嘅功能，兼且同時可拍靜態影像，唔使吓吓轉Mode，夠晒方便。
微距魚鱗現形
DC有1cm微距唔簡單，CA65都得，而且影相同攝錄都具備呢種效果。記者試過將CA65放入水中追拍魚仔；真試1cm微距，係魚都走晒啦！但放後少少至3至5cm範圍，微距效能一樣能令片片魚鱗片現形，威力幾強吓；距離再後少少，介乎8至10cm，清楚Zoom到個魚頭大一大都得。再試埋CA65的高感光度，升至最高1600，其實離唔開粗微粒問題。水底唔同陸上，攝錄時感光度一定要比正常調高一至兩級，如果係風和日麗，用CA65調到ISO400，出來效果幾理想，但再多就一般了。
Profile
鏡頭︰637萬像素CCD
變焦︰5倍光學、12倍數碼
顯示屏︰2.5"
攝錄格式︰ MPEG4/H.264
（640×480/30fps）
體積︰70.4×111.4×40.5mm
重量︰217g
查詢︰21936888（三洋）
