悠穎馳有時夜晚揸車出街，好怕經過旺角、銅鑼灣、沙田呢類繁忙區域，除咗怕塞車之外，最怕就係俾班的士大佬泊晒喺馬路度等客，想行都行唔到。
老實講，大家都明白的士大佬搵食艱難，如果唔喺呢啲旺區度「紮馬」，都好難搵到啲去得遠嘅長途客，另外可方便夜歸人快啲返屋企；之但係一啲唔守法嘅的士大佬好似老奉咁，話知係禁區、巴士站定十字路口，照將部車泊喺度等客。我試過有晚揸車經過旺角雅蘭中心，眼見巴士站泊晒等客的士，巴士同小巴就迫住喺中線落客，搞到得番快線可以行。就係咁，原本幾分鐘車程足足要我喺條車龍等咗差唔多半個鐘！沙田新城市廣場同葵芳新都會廣場亦一樣，除咗的士站爆咗照泊入去，有啲仲喺路窄人多嘅車路上停低等客，搞到人車爭路嘅情況更嚴重。
所以悠穎馳奉勸各位的士大佬，停車等客搵食都要顧吓其他人，免得一陣要警察先生嚟抄牌清場就唔好啦！
悠穎馳
豪邁不羈，愛車如命，聽幾下引擎聲就知咩車！