前日，我哋壹傳媒出業績。一份業績報告，就係一間公司嘅倒後鏡，睇到去到邊。不過，今日孫柏文想講嘅係未來。
用紙張印刷嘅傳媒產品，喺1999年前已被當時嘅Intel總裁「溫馨提示」。佢話雖然人類始終要睇新聞報道，不過如果報紙唔諗方法迎合互聯網，遲早滅亡。壹傳媒當然唔會坐以待斃，根據前輩話，我哋迎合互聯網嘅方法，就係變成兩棲動物。有紙，有網。
當然，淨係將紙上文字擺上網，根本冇「進化過」，問題就係點樣用網嘅多種表達方法去報新聞。有見及此，前輩話要用video報新聞。如果拍唔到事件經過，前輩就話可以做電腦動畫，令讀者、觀眾更投入故事經過。其實，孫柏文從第一次聽到呢個「動畫計劃」，已經非常之buy，好想參與將佢成功催生，所以反覆思考。
以下就係諗咗好耐，噚日為止嘅睇法。不過同大家分享之前，我想介紹一個叫做UncannyValley嘅概念。首先，Uncanny呢個概念係弗洛伊德發揚光大，指一樣嘢仿人嘅像真度好高，不過因為知道唔係真嘢，喺人嘅心目中會產生一種唔舒服，甚至有一種抗拒嘅恐怖感覺。即係仿人像真度低番啲，更容易令人接受。用深啲英文就好似係叫做cognitivedissonance。
畫真啲死快啲
最好例子係，如果有個人因工業意外冇咗隻手臂而要佩戴義肢，伸隻義肢出嚟握手時，你覺得如果隻義肢用木造，仲要一睇就知係木，會令你舒服啲？定係一隻驟眼睇好似真，不過握手起嚟就完全冇體溫嘅矽膠義肢呢？當然，如果可以做到隻義肢摸起嚟呃晒五個感官，當然唔會覺得恐怖。
如果用圖表（圖A）表達，由像真度係零開始，一個人接受嗰樣嘢似人嘅程度會慢慢提升。不過去到大約七成像真度嘅時候，人就開始會唔接受。去到九成，甚至令人反感，有要抗拒嘅恐怖感。直到可以欺騙晒五個感官時，甚至百分之一百係真人，人嘅接受程度就會完全唔會唔舒服。正因為圖表有個「谷」，所以叫UncannyValley「抗拒恐怖谷」。而做過好多次整容手術嘅人，就係因越嚟越非human，所以跌落嚟，令人反感。
今日要講呢個有100年歷史嘅概念，係因為電腦動畫都有同一現象（圖B）。大家可能成日都唔明點解一間擁有超過500個漫畫家，一年先一部110分鐘動畫電影嘅Pixar「唔畫真啲」。又或者點解嗰啲「畫真啲」嘅電影公司，畫一間、死一間。其實，就係因為就算散盡千金，都未必跳得過呢個UncannyValley。跳得過就用咗好多錢，跳唔過就……
講真，死得最慘嘅「畫真啲」電影，一定係有史以來畫得仿人像真度最高，2001年嘅《FinalFantasy》。就算故事被花旗國首屈一指嘅影評人Ebert，評為同Pixar嘅《超人特攻隊》一樣咁好睇，最後都因為UncannyValley，搞到公司執笠。
孫柏文曾經喺演藝學院讀過短期編劇課程，深信老師話齋，故事劇本勝於一切。喺電影動畫當中，畫得「最差」嘅一定係SouthPark《衰仔樂園》，雖然成本只係《FinalFantasy》嘅1/6，不過票房就贏晒。
作為一間要畫動畫嘅公司，如果用多一蚊喺畫真啲到，分分鐘不但無效益，仲要跌落UncannyValley。從成本效益角度講，如果好劇本真係勝於一切，不如嗰一蚊就用嚟製造寫得好同肯挑戰難度嘅劇本，可能會仲好？
金手指網誌： http://phatdat.blogspot.com
三齣動畫電影成本及票房
電影：《衰仔樂園》
製作成本（美元）：2100萬
票房（美元）：5000萬
電影：《超人特工隊》
製作成本（美元）：9200萬
票房（美元）：2.61億
電影：《FinalFantasy》
製作成本（美元）：1.2億
票房（美元）：3000萬