近日大家都談論緊種族歧視問題，41歲英格蘭球星舒寧咸就上演黑白大融和，之不過佢涉嫌幫黑人隊友超速駕駛時頂包，分分鐘要坐監，但佢竟然仲有心情同兩個導彈身材嘅金髮妹去西班牙嘅馬貝亞（Marbella）度假，享受陽光與海灘，唔到你唔服！
冒認司機涉妨礙司法公正
現時係自由身嘅舒寧咸上周先獲頒發MBE勳銜，不過原來佢涉嫌喺一單超速駕駛案兼冒認係司機，仲喺上個月15日被捕㖭！據講，若果「咸叔」呢次妨礙司法公正罪名成立，最多要坐6年監，到時出番嚟都要改口叫「咸伯」喇！
舒寧咸呢單嘢純粹係攞嚟衰，因為事發當晚，佢同韋斯咸黑人球員26歲嘅森莫亞同31歲嘅紐頓同車（兩人被捕後獲保釋）；當時架車超速被影快相，由於司機再扣3分就要停牌，警方指一位41歲男子自認係司機，於是被指妨礙司法公正。
據講，英國有100萬名司機扣多3分就停牌，仲有6分就停牌嘅更有500萬人，可見好多人都可能為免被停牌而搵人頂包。因此當地警方今次決定執正來做，至今成個「咸叔頂包」事件已經有12人被捕。
司機傳係黑人呢鋪杰
其實，「咸叔」都成41歲人喇！佢68歲嘅老竇仲係退休警察嚟，有咩理由唔知頂包嘅後果呢？對「咸叔」最不利嘅係，有目擊者同警察講當晚個司機係黑人嚟，所以呢單嘢都幾難打得甩。而英國小報《每日郵報》噚日圖文並茂佢喺西班牙度假嘅情況，唔通佢諗住喺入冊前鬆一鬆？