同BBModel嘅媽咪Isabella講起育嬰室，佢最感同身受：「有時去酒樓冇育嬰設施，廁所又細又污糟，惟有同BB屈喺後巷換片。」真係聽見都淒涼。雖然話今年多人生仔，不過其實唔係個個商場都有育嬰設施，即使有，都未必個個周到。今日同大家一次過走勻港九區最新、最頹同最豪育嬰室，等各位媽咪行街街都知邊度可以同BB洗PatPat！
記者：劉嘉蕙
攝影：楊錦文，譚盈傑
Model：Wincy、Isabella（TheGroup）
專業陪月員評分
講到商場育嬰室，專業幫各位媽咪湊B、閱B無數嘅陪月員最有資格畀意見。陪月員方姐同艷姐話一個好育嬰室要有3大條件。
理想育嬰室3大原則
1.位置便利
育嬰室即係BB廁所，最好多而就腳，起碼每兩層有一個至理想，路牌亦要清晰。另外湊B出街成日大包細包，行去育嬰室條路最好冇門，一條大路直入，唔使左兜右兜。
2.環境舒適
有私隱：育嬰室係BB換片片、媽咪餵奶嘅地方，最好空間獨立，等BB同媽咪都有私隱。不過好多商場都只係喺女廁闢開一角做育嬰室，更頹者係連傷殘人士廁所一齊用，BB留多陣都嫌臭呀！
夠闊落：BB出街陣容唔細，有車、大包嬰兒用品，育嬰室唔夠大邊放得落？
3.設備齊全
好的育嬰室，亁淨衞生係基本條件，有齊洗手盆、皂液係起碼，另外亦要有足夠設備，做到「哺乳」同「換片」兩大功能。哺乳方面，要有張舒服嘅椅俾媽咪坐，有埋暖奶器就最理想。換片就需要安全穩陣嘅換片板，等大家換片換得安心又放心。
3大商場育嬰室專業評級
了解過3大原則，睇吓以下3個媽咪至愛商場嘅育嬰室，能唔能夠符合專業陪月需求，呵護BB嘅PatPat。
國際金融中心商場育嬰室
IFC名店又多又闊落，媽咪最鍾意行，育嬰室燈光暗黃，幾有格調，BB換片都換得型啲！
暖奶器夠方便
育嬰室一角裝有暖奶器，連埋插頭隨時隨地加熱奶樽都得。
位置便利★★★（5★為最高）
讚：4層高商場有3個育嬰室，分佈於L1、L2及L3，指示亦夠清晰，不過商場實在太大，行到腳軟先到。
彈：L1樓育嬰室喺女廁入面，爸爸冇得入，好彩門口都有告示，指示爸爸帶BB去2樓另一個育嬰室。
環境舒適★★★★囗
L2育嬰室約40呎，都算闊落，一面牆上裝有大鏡，媽咪乘機扮靚都得喎！
設備齊全★★★★★
CheckPoint1：換片板
用Rubbermaid摺叠式換片板，面積83cm×34cm，摸落好穩陣，不過艷姐嫌佢重得滯，一手抱B一手落板，有啲危險。
CheckPoint2：哺乳椅
透明哺乳椅好靚，都算好坐，加上昏黃燈光，以為自己Shopping緊㖭！
megaBOX育嬰室
九龍灣新場megaBOX千金打造親子王國，豪華育嬰室自然係主打項目，聽聞遲啲9樓親子層仲會整多個糖果主題育嬰室，分分鐘靚到BB都唔捨得走。
名牌BB車任借
決心做親子王國，megaBOX親子服務亦想得周到。大堂免費任借名牌ChiccoBB車，另外又有嬰兒食品加熱及緊急紙尿片提供，BBModelWincy媽咪讚夠晒方便，自己一個人帶BB行街都得！
位置便利★★★
讚：全個商場有8個育嬰室，分佈於G/F、L1、L2、L5、L6、L7及L9層，可算相當便利，路牌指示亦夠多夠顯眼。
彈：育嬰室收埋喺走廊入面，沿途經過九曲十三彎，記者冇方向感，行錯咗幾次路。另外途中推開2至3度重門，帶BB出街次次大包細包，左手開得度門，右手唔知抱得個B定拎起個袋，真係唔方便。
環境舒適★★★★
L9層育嬰室面積約50呎，都算夠闊落。有獨立空間，但係冇鎖，媽咪入去先敲敲門最好。
設備齊全★★★★
CheckPoint1：換片板
換片區方面，育嬰室有真皮換片兜，面積夠大，足足有96cm×59cm，圍起晒4邊，安全又舒服。BBModelWincy瞓落去，腳仔撐撐好似好Enjoy。
CheckPoint2：哺乳椅
真皮梳化，媽咪餵餵吓奶可能舒服到瞓着。
海港城育嬰室
尖沙嘴區係眾所周知嘅親子大本營，附近有大型玩具店，媽咪最鍾意拖BB去行商場，望吓海。不過海港城作為區內龍頭商場，育嬰設施似乎做得唔多足。
位置便利★★★★
以數量計算，海港城育嬰設施不少，L2有5個，地下有2個，都幾易搵。
環境舒適★
海港城大部份育嬰設施都喺女廁入面，連埋小童洗手間開一格。特別一提地下層玩具反斗城旁邊間育嬰室，頹到喺傷殘人士洗手間入面整塊板，環境幽暗，又焗又臭。
設備齊全★★
CheckPoint1：換片板
標準海港城換片板面積約69cm×31cm，質料輕身，有安全帶，感覺亦算穩陣。
CheckPoint2：哺乳椅
一係冇，一係頹膠椅，坐到小朋友，媽咪小心坐爛，餵奶都係搵過第二度啦！
育嬰室地方幾狹窄，而且環境不是太亁淨，同BB換片不太方便。
方姐最愛 新都城育嬰室
方姐話megaBOX豪裝唔係佢心水，佢反而推介將軍澳新都城二期嘅育嬰室，換片區夠闊落，梳化夠大，最緊要環境夠亁淨，可以容納到3、4個媽咪打躉吹水。不過有媽咪話，牆身無端端有塊玻璃，餵人奶有啲唔方便。
方姐推介衞生三寶
雖則話大部份商場育嬰設備都好齊全，不過方姐話，帶BB出街，衞生方面絕不能掉以輕心，最好帶埋以下衞生三寶。
一寶：床墊
大肚婆常用即棄床墊，方姐話用嚟墊住塊換片板最Fit，用完就丟得，一包十幾片，一般藥房有售。
二寶：火酒紙巾（左）
育嬰室一般有提供皂液同水，但係方姐嫌咁樣未夠徹底，最好帶埋火酒紙巾前前後後抹勻雙手。
三寶：濕紙巾（右）
湊B出街幾時都要袋定濕紙巾，唔使開水喉，方便又瀟灑。
方姐示範正確換片步驟
媽咪有意見
溫太
「通常日資百貨公司育嬰設備比較齊全，有時去細商場連育嬰板都冇塊，BB大小二便起嚟真係唔方便。」
余太
「平時冇話特登揀定邊個商場有育嬰室先去，不過有當然方便好多，印象中鑽石山荷里活廣場育嬰室都唔錯。」
梁太
「我較常去新都城育嬰室，幾開揚闊落，不過門口望到入面，餵人奶唔方便。」
BBModel媽咪Isabella
「我住將軍澳，個人心水觀塘apm育嬰室，設備幾齊，不過今日睇過megaBOX呢個育嬰室都幾靚。」
